मुंबई : मंत्रिमडळाचा विस्तार पुढील तीन ते चार दिवसांत होण्याची शक्यता वर्तवली जात आहे. यासंदर्भात चर्चेसाठी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस हे दिल्लीला रवाना झाले आहेत. दिल्लीत भाजपच्या पक्षश्रेष्ठींची चर्चा झाल्यानंतर आजच यावर शिक्कामोर्तब होण्याची शक्यताही वर्तवली जात आहे. (Cabinet expansion may sealed today CM Shidne DyCM Fadnvis left for Delhi)

दिल्लीत आज मावळते राष्ट्रपती रामनाथ कोविंद यांचा निरोप समारंभ पार पडत आहे. या कार्यक्रमाला उपस्थित राहण्यासाठी उपमुख्यमंत्री दिल्लीला रवाना झाले आहेत. याचदरम्यान राज्यातील राजकीय घडामोडींवर भाजपच्या पक्षश्रेष्ठींची चर्चा होणार आहे.

दरम्यान, भाजपकडून कोणाकोणाला संधी मिळू शकते यामध्ये चंद्रकांत पाटील (पश्चिम महाराष्ट्र), सुधीर मुनगंटीवार (विदर्भ), गिरीश महाजन (उत्तर महाराष्ट्र), राधाकृष्ण विखे-पाटील (पश्चिम महाराष्ट्र), आशिष शेलार (मुंबई), प्रवीण दरेकर (मुंबई), चंद्रशेखर बावनकुळ (विदर्भ) या नेत्यांना मंत्रीपदासाठी संधी मिळू शकते.

तर शिवसेनेच्या शिंदे गटाकडून गुलाबराव पाटील (उत्तर महाराष्ट्र), उदय सामंत (कोकण), दादा भुसे (उत्तर महाराष्ट्र), शंभूराज देसाई (पश्चिम महाराष्ट्र), अब्दुल सत्तार (मराठवाडा), संदिपान भुमरे (मराठवाडा) या नेत्यांना मंत्रीपदासाठी शिवसेनेकडून संधी मिळू शकते.