पुणे : राज्यात सध्या लोकसभेच्या तिसऱ्या टप्प्यासाठी मतदान होत आहे. या दरम्यान ईव्हीएमची पूजा केल्याप्रकरणी राज्य महिला आयोगाच्या अध्यक्ष रुपाली चाकणकर या अडचणीत सापडल्या आहेत. चाकणकर यांच्या विरोधात सिंहगड पोलीस स्टेशनमध्ये गुन्हा दाखल करण्यात आला आहे. ईव्हीएम मशीनची पूजा केल्या प्रकरणी त्यांच्याविरोधात हा गुन्हा दाखल करण्यात आला आहे.

बारामती लोकसभा मतदारसंघात आज मतदान पार पडत आहे. या मतदारसंघात राष्ट्रवादीच्या दोन गटात लढत होत असून या लढतीकडे संपूर्ण देशाचे लक्ष लागले आहे. या मतदारसंघात सुप्रिया सुळे आणि सुनेत्रा पवार या आमने सामने आहेत. यादरम्यान राज्य महिला आयोगाच्या अध्यक्ष रूपाली चाकणकर यांचा एक फोटो व्हायरल झाला होता. या फोटो मध्ये मतदान केंद्रावर चाकणकर या आरती करताना दिसत आहेत. हा व्हिडीओ व्हायरल झाल्यानंतर सोशल मीडीयावर अनेकंना निवडणूक आयोगाच्या एक्स अकाउंटला टॅग करत याबद्दल विचारणा केली आहे.