नाशिक : राष्ट्रवादीमधील फुटीनंतर शरद पवार यांनी महाराष्ट्र दौरा करणार असल्याची घोषणा केली आणि पहिली सभा माजी मुख्यमंत्री छगन भुजबळ यांचा मतदारसंघ असलेल्या येवल्यात घेतली. पण त्याच दिवशी छगन भुजबळ यांनीसुद्धा मतदारसंघात आपलं शक्तीप्रदर्शन केलं. दरम्यान, शरद पवारांनी पत्रकार परिषदेत आणि सभेत भुजबळांवर केलेल्या टीकेवर भुजबळांनी उत्तर दिलं आहे.

"शरद पवारांनी कालच्या सभेत सांगितलं की मी त्यांना येवला मतदारसंघ दिला पण तसं नाही येवला मतदारसंघ मी साहेबांना मागून घेतला" असं भुजबळ म्हणाले. त्याचबरोबर तुमच्या जवळचे लोकं तुम्हाला सोडून का जातात याचा विचार करा, राजीनामा मागे घ्यायचा होता तर दिलाच कशाला, मी भविष्याच खूप मोठे गौप्यस्फोट करणार आहे असा इशारा भुजबळांनी पवारांना दिला आहे.

शरद पवार यांच्या येवल्यातील पहिल्या सभेवरही त्यांनी प्रश्नचिन्ह उपस्थित केले आहेत. तुम्ही पहिली सभा तुमच्या बारामतीत का घेतली नाही? अजित पवार तर बंडाचे प्रमुख आहेत. तेही बारामतीचे आहेत. मग तुमची पहिली सभा दिलीप वळसे यांच्या मतदारसंघात ठरली असताना ती येवला या माझ्या मतदारसंघात का घेतली? मी ओबीसी आहे म्हणून तुम्ही येथे सभा घेतली का? असा खोचक सवाल भुजबळांनी पवारांना केला आहे.

भुजबळ पुढे म्हणाले की, "हे झालं कुठून? साहेब तुमच्या घरातून झालं ना? आता ६१-६२ वर्ष ज्यांना तुम्ही सांभाळलं ते अजित पवार तर मुख्य आहेत. ते तर उपमुख्यमंत्री सुद्धा आहेत, ते बघा ना का आहेत ते. ही इतकी मंडळी का गेली याचा विचार करा. दिलीप वळसे, दिल्लात अनेक वर्षांपासून त्यांच्यासोबत मंत्री, खासदार असलेले प्रफुल्ल पटेल का जातात? याआधी सोनिया गांधी, नरेंद्र मोदी यांच्या सोबत चर्चा करण्यासाठी पवार साहेब प्रफुल्ल पटेलांनांच पाठवत होते. ते का सोडून गेले याचा विचार करायला पाहिजे." शरद पवारांना वाटतं की, छगन भुजबळांनी हे घडवून आणलं ही चुकीची कल्पना आहे, असेही भुजबळ म्हणाले.