मुंबई : मराठवाडा, विदर्भ आणि उत्तर महाराष्ट्रात झालेल्या अतिवृष्टीमुळं शेतकऱ्यांचं मोठं नुकसान झालं आहे. त्यामुळं त्यांना दिलासा देताना तत्काळ मदत जाहीर करण्याची मागणी महाराष्ट्र नवनिर्माण सेनेचे प्रमुख राज ठाकरे यांनी मुख्यमंत्र्यांना ई-मेल करुन केली होती. त्यांच्या या ई-मेलची दखल मुख्यमंत्री कार्यालयानं घेतली असून त्यांच्या मागणी संबंधीत विभागाकडे पाठवण्यात आल्याचं त्यांना सांगण्यात आलं आहे.

आज अर्थात ३० सप्टेंबर २०२१ रोजी दुपारी तीन वाजण्याच्या सुमारास राज ठाकरे यांनी मुख्यमंत्री कार्यालयाला याबाबत ई-मेल केला होता. यामध्ये मराठवाडा, विदर्भ आणि उत्तर महाराष्ट्रात झालेल्या अतिवृष्टीमुळं झालेल्या नुकसानीबाबत शेतकऱ्यांना ५०,००० हजार रुपयांची तातडीची मदत देण्याची मागणी केली होती. यानंतर पंचनाम्यांचे सोपस्कर पार पाडा असंही ई-मेलला जोडलेल्या मनसेच्या पत्रकात म्हटलं होतं.

आधी कोरोनाची स्थिती आणि त्यानंतर आलेल्या अतिवृष्टीमुळं शेतकरी कोसळला आहे. त्यामुळं त्यांना केवळ आश्वासन नकोत तर शीघ्रकृतीद्वारे मदत करण्याची गरज असल्याचं राज ठाकरे यांनी ई-मेलमध्ये म्हटलं आहे. शेतीबरोबरच घरांचं आणि पाळीव प्राण्यांचंही मोठे नुकसान झाले आहे. याची पंचनाम्यांनंतर रितसर मदत शेतकऱ्यांना दिली जाईलच पण सध्याचा काळ हा आणीबाणीचा असून त्यांना मदतीसाठी वाट पहायला लावू नका. या भागात शासनानं ओला दुष्काळ जाहीर करावा असंही राज ठाकरे यांनी मुख्यमंत्र्यांना केलेल्या ई-मेलमध्ये म्हटलं होतं.

"आपला ई-मेल मुख्यमंत्री कार्यालयाला प्राप्त झाला असून तो पुढील कार्यवाहीसाठी कृषी तसेच मदत व पुनर्वसन विभागाला पाठवण्यात आला आहे," असं उत्तर मुख्यमंत्री कार्यालयाकडून राज ठाकरे यांच्या ई-मेलला देण्यात आलं आहे. मुख्यमंत्री कार्यालयानं राज ठाकरेंचा ई-मेल कृषी विभागाचे एकनाथ दवळे आणि मदत व पुनर्वसन विभागाच्या असीम गुप्ता या अधिकाऱ्यांकडे फॉरवर्ड करत तो मनसेला सीसी करण्यात आला आहे.