सोलापूर - मिरजहून नाझरा (ता. सांगोला) येथे दुचाकीवरून जाताना 9 जूनला झालेल्या अपघातात राजू चव्हाण यांचा जागीच मृत्यू झाला, तर त्यांचा मुलगा ज्ञानेश्‍वर (वय 20) याच्या डोक्‍याला जबर मार लागला होता. त्याला सोलापुरातील खासगी रुग्णालयात उपचारासाठी दाखल केले. डॉक्‍टरांनी त्याला "ब्रेनडेड' घोषित केले. डॉक्‍टरांच्या प्रबोधनानंतर आई उषा चव्हाण यांनी मुलाच्या अवयदानाचा धाडसी निर्णय घेतला. यशोधरा रुग्णालयात अवयवदानाची शस्त्रक्रिया पार पडली. 

पतीच्या अपघाती मृत्यूनंतर मुलालाही काळाने हिरावून नेल्याने त्या माऊलीवर दुःखाचा डोंगर कोसळला. मात्र, अवयवदान केले तर मुलारूपाने इतरांना जीवनदान मिळेल, या उद्देशाने आई उषा चव्हाण यांनी ज्ञानेश्‍वरचे अवयवदान करण्याचा निर्णय घेतला. राजू चव्हाण हे ट्रॅक्‍टरचालक होते. ज्ञानेश्‍वर त्यांना हातभार लावत होता. त्याचा दुसरा भाऊ दिव्यांग असल्याने कुटुंबाची जबाबदारी ज्ञानेश्‍वरवरच होती. दहावीनंतर शिक्षण सोडून त्याने कुटुंबाची जबाबदारी अंगावर घेतली होती. मात्र, काळाने त्याला अचानकपणे हिरावून नेले. 

पाच जणांना जीवनदान 
ज्ञानेश्‍वरच्या अवयवदानामुळे पाच जणांना जीवनदान, तर दोघांना दृष्टी मिळणार आहे. त्याचे एक फुफ्फुस पुण्यातील सह्याद्री रुग्णालयाला, दुसरे ग्लोबल रुग्णालयाला, एक मूत्रपिंड व स्वादुपिंड दीनानाथ मंगेशकर रुग्णालयाला आणि दुसरे मूत्रपिंड यशोधरा रुग्णालयाला दिले आहे. दृष्टिपटल सर्वोपचार रुग्णालयास दान केले आहे. ज्ञानेश्‍वरचा चुलत भाऊ दत्तात्रेय चव्हाण याने वृत्तपत्रातील बातमी वाचून त्याच्या अवयवदान करण्याचा निर्णय घेतला आणि उषा चव्हाण यांनी त्याला होकार दिला.