राज्यात शिंदे-फडणवीस सरकार स्थापन झाल्यापासून राजकीय बदलांना वेग आला आहे. सध्या राज्यात मुख्यमंत्र्यांनी घेतलेल्या निर्णयांमुळे विरोधकांकडून सरकारवर टीका केली जात आहे. दरम्यान, राष्ट्रवादी काँग्रेसच्या खासदार सुप्रिया सुळेंनी हे बिचारे मुख्यमंत्री, त्यांच्या मागे खूप मोठं षडयंत्र आहे. त्यामुळे मला त्यांची खूप काळजी वाटते, असं वक्तव्य केलं होत. यावरून आता भाजपच्या चित्रा वाघ यांनी सुळेंवर निशाणा साधला आहे.

चित्रा वाघ यांनी यासंदर्भात ट्वीट केलं आहे. त्या म्हणाल्या, सध्या भाई आत असल्याने ताईंवर बोलायची मोठ्ठी जबाबदारी पडलीये. त्यामुळे खुप काळजी वाटते सन्माननीय ताईंची, असं म्हणत त्यांनी टोला लगावला आहे. त्यामुळे आता हा वाद पुन्हा एकदा चव्हाट्यावर आला आहे.

पुणे महानगरपालिका समाज विकास विभाग महिला बचत गटातील महिलांसाठी विविध कोर्सचे शिबीर आयोजित करण्यात आले होते. यामध्ये सहभागी झालेल्या महिलांना प्रमाण पत्र वाटप समारंभ आयोजित करण्यात आला होता. समारंभात सुप्रिया सुळे बोलत होत्या. यावेळी त्यांनी मुख्यमंत्री आणि उपमुख्यमंत्र्यांवर टीका केली होती.

काय म्हणाल्या आहेत सुप्रिया सुळे ?

नवीन सरकार गोंधळलेले आहे. मुख्यमंत्री एकनाथ शिंदेंचा अपमान होतोय आणि मुख्यमंत्र्यांचा अपमान म्हणजे महाराष्ट्राचा अपमान. हे बिचारे मुख्यमंत्री, त्यांच्या मागे खूप मोठं षडयंत्र आहे. त्यामुळे मला त्यांची खूप काळजी वाटते. त्यांना प्रॉम्प्टींग करणं, चिठ्ठी देणं अशा कृतीतून मुख्यमंत्र्यांना कमीपणा दाखवायचं काम उपमुख्यमंत्री करत आहेत. कोण कुठल्या पक्षात आहे हे आजकाल कळतच नाही. मी स्वतःच गोंधळात आहे. सध्या जे राजकारण सुरू आहे. ते महाराष्ट्राला न शोभणारं आहे. मला मुख्यमंत्री एकनाथ शिंदेंची खूप काळजी वाटते, असं त्या म्हणाल्या होत्या.