Ajit Pawar News : राज्याच्या राजकारणाच्या पार्श्वभूमीवर एक महत्त्वाची घडामोड समोर असून मुख्यमंत्री एकनाथ शिंदे हे अचानक दिल्ली दौऱ्यावर रवाना झाले आहेत. मुख्यमंत्री एकनाथ शिंदे हे सहकुटुंब दिल्लीत दाखल झाले आहेत. खासदार शिंदे यांच्या मिनाबाग येथील निवासस्थानी ते मुक्कामी थांबले आहेत. तसेच मुख्यमंत्री शिंदे हे आज पंतप्रधान नरेंद्र मोदी यांची तसेच भाजपच्या इतरही वरिष्ठ नेत्यांची भेट घेण्याची शक्यता आहे.

मुख्यमंत्री एकनाथ शिंदे हे काल रात्री अचानक मुंबईहून दिल्लीला रवाना झाले. दरम्यान हा नियोजित दौरा नसून मुख्यमंत्री शिंदे वैयक्तिक कामासाठी दिल्लीला जाणार असल्याचं सांगितलं जात आहे. तरी दिल्लीत चे भाजपच्या वरिष्ठ नेत्यांची भेट घेणार आहेत.

दरम्यान तीन दिवसांपूर्वीच म्हणजेच १८ जुलै रोजी एकनाथ शिंदे हे एनडीएच्या बैठकीसाठी दिल्लीत दाखल झाले होते. ते परत दिल्लीत गेल्याने उर्वरित मंत्रिमंडळ विस्ताराला वेग येणार का याबद्दल चर्चाना वेग आला आहे.

अजित पवार राष्ट्रवादीच्या ८ इतर आमदारांना सोबत घेऊन सत्तेत सहभागी झाल्यानंतर लवकरच उर्वरित मंत्रिमंडळाचा विस्तार केला जाईल असे सांगितले जात होते. पावसाळी अधिवेशन संपल्यानंतर मंत्रिमंडळाचा विस्तार केला जाण्याची शक्यताक आहे. त्यामुळे एकनाथ शिंदे यांच्या दिल्ली दौऱ्यात याबद्दल काही चर्चा होते काय ते पहाणे महत्वाचे ठरणार आहे.

अजित पवार मुख्यमंत्री होणार?

उद्धव ठाकरे गटाचे नेते संजय राऊत यांनी अजित पवार लवकरच मुखमंत्री होतील असं विधान काल केलं. यानंतर आता राष्ट्रवादीच्या एका बड्या नेत्यांने देखील अजित पवार यांचा मुख्यमंत्री असा उल्लेख केला आहे. आज (दि. २२ जुलै) महाराष्ट्राचे उपमुख्यमंत्री देवेंद्र फडणवीस आणि अजित पवार यांचा वाढदिवस आहे. या वाढदिवसानिमित्त राष्ट्रवादीचे नेते अमोल मिटकरींनी एक व्हिडिओ ट्विट केला असून यामुळे चर्चांना उधाण आलं आहे.

अमोल मिटकरी यांनी आपल्या अधिकृत ट्विटर अकाऊंटवरून अजित पवारांचा एक व्हिडिओ ट्विट केला. या व्हिडिओला त्यांनी 'मी अजित अनंतराव पवार महाराष्ट्राचा मुख्यमंत्री म्हणून शपथ घेतो की......! लवकरच #अजितपर्व' असे कॅप्शन दिले. यामुळे पुन्हा राजकीय वर्तुळात भुकंप पाहायला मिळणार का अशी चर्चा आहे.