राज्यातला मोठा मतदार वर्ग आपल्याकडे आकर्षून घेण्यासाठी आता मुख्यमंत्री एकनाथ शिंदे यांनी एक नवा प्लॅन आखल्याची चर्चा आहे. एसटी महामंडळाच्या मदतीने ज्येष्ठांसाठी मोफत देवदर्शन सुविधा देण्याचं नियोजन सध्या सुरू आहे.

राज्यात ज्येष्ठ नागरिकांची संख्या एक कोटींच्या आसपास आहे. या ज्येष्ठ नागरिकांना मोफत देवदर्शन घडवून आणण्याचा विचार सध्या शिंदे सरकारचा सुरू आहे. प्रत्येक शनिवार-रविवारी ही सुविधा देण्यात येणार आहे.

यासाठी एसटी महामंडळानेही मदत कऱण्याची तयारी दर्शवली आहे. महामंडळाकडून दोन हजार एसटी बसेस उपलब्ध करून देण्यात येणार आहेत. महाराष्ट्रातल्या प्रमुख तीर्थक्षेत्रांना जोडणारी ही सेवा असेल. ही सेवा देण्यासंदर्भात प्रस्ताव तयार करण्याचे आदेश मुख्यमंत्री शिंदे यांनी दिले आहेत.

हेही वाचा - सूर्यकुमार...भारतीय क्रिकेट मधला 'लंबी रेस का...'

मुख्यमंत्री झाल्यापासून एकनाथ शिंदे यांनी अनेक तीर्थक्षेत्रांना भेटी दिल्या आहेत. गणेशोत्सवाच्या काळात ते अगदी छोट्या मोठ्या गणपती मंडळांनाही भेटी देत होते. त्यामुळे तेव्हापासूनच त्यांनी मतदार आपल्याकडे आकर्षून घेण्याचे प्रयत्न सुरू केले होते. आता मोफत तीर्थक्षेत्र प्रवास हे याचेच एक उदाहरण आहे.