मुंबई : राज्य सरकारने दहीहंडी उत्सवावर (Dahi handi celebration 2021) निर्बंध लावले असतानाही मनसे आणि भाजपने आक्रमक पवित्रा घेतला. पोलिसांनी कारवाईचा इशाराही दिला असतानाही दहीहंडी उत्सव साजरा केला. त्यानंतर राज ठाकरे यांनी देखील महाविकास आघाडी सरकारवर टीका केली. त्यावरूनच आता मुख्यमंत्री उद्धव ठाकरे (CM Uddhav Thackeray) यांनी भाष्य केले आहे. ठाण्यात ऑक्सिजन प्लांटच्या उद्घाटन समारंभात ते बोलत होते.

“काही जणांनी दहीहंडी केली. हे काय स्वातंत्र्य मिळविण्यासाठी केलेले युद्ध नाही आहे. कोरोनाचे नियम तोडून आम्ही करुन दाखवलं हे काय मोठं स्वातंत्र्य नाही मिळवलं. त्याच्यासाठी आंदोलन केलं असतं तर भाग वेगळा. फुकट कोरोना वाटप करायला हा सरकारी कार्यक्रम नाही. याला विरोध करायला हा सरकारी कार्यक्रम नाही. मास्क घालणे, हात धुणे, अंतर ठेवणे या पाळल्या नाहीत तर तिसरी लाट येऊ शकते. केंद्राने दिलेल्या पत्रात देखील ते नमूद आहे,'' असे मुख्यमंत्री उद्धव ठाकरे यांनी सांगितले.

दहीहंडीचा उत्सव साजरा करता येत नाहीये, याची मला जाणीव आहे. पण, सध्या गर्दी करण्यासारखी परिस्थिती नाही. कोरोना संकट देशावर आहे. तिसऱ्या लाटेचा धोका कायम आहे. केंद्र सरकारनेही काळजी घेण्याच्या सूचना दिल्या आहेत. दहीहंडी आणि गणेशोत्सव काळात गर्दी करु नका, असं केंद्राने राज्यांना कळवलं आहे. जे आंदोलन करत आहेत त्यांनी केंद्राचे हे पत्र पाहावे, असंही ठाकरे म्हणाले.

दहीहंडीचा तो थरार, ते उधाण मला अजूनही आठवते. पण आज गर्दी करून उत्सव साजरी करण्यासारखी परिस्थिती नाही. कोरोनाचे संकट जगभर पसरले आहे. 90 टक्के समाजकारण आणि 20 टक्के राजकारण ही शिवसेनेची ओळख. त्यामुळे शिवसेनेचे ठाणे आणि ठाण्याची शिवसेना हे एक वेगळं नातं आहे. त्यामुळेच शिवसेनेबद्दल लोकांना, ठाणेकरांना वाटणारा विश्वास आजही कायम असल्याचं मुख्यमंत्री म्हणाले.