आदित्य ठाकरेंचीही मंत्रालयाकडे पाठच

मुंबई: मुख्यमंत्री उध्दव ठाकरे (CM Uddhav Thackeray) ‘मातोश्री’तून (Matoshri) बाहेर पडत नसल्याची विरोधकांकडून टीका होत असतानाच, गेल्या १५ महिन्यांत मुख्यमंत्री उद्धव ठाकरे यांनी एकदाही मंत्रालयाची पायरी चढली नसल्याचे उघड झाले आहे. कोरोना (Corona Outbreak), लोकांच्या गर्दीमुळे (Crowd) ठाकरे हे येत नसल्याचे मंत्रालयातील सुरक्षा व्यवस्था, प्रशासनाने स्पष्ट केले. परिणामी, मुख्यमंत्री भेटत नसल्याचा सूर विरोधकांसह महाविकास आघाडीच्या आमदारांत आहेत. (CM Uddhav Thackeray did not visit even once to Mantralay Office in last 15 months)

मुख्यमंत्री ठाकरे हे ‘मातोश्री’, ‘वर्षा’ आणि सह्याद्री अतिथिगृहातूनच आपली कामे आटोपत असल्याचे सांगण्यात आले. लॉकडाउनमध्ये गेल्या वर्षी मार्च महिना आणि त्यानंतरचे काही दिवस अत्यावश्यक सेवा वगळता मंत्रालयातील सर्व कामे बंद होती. त्यात आपल्यामुळे सुरक्षा व्यवस्था, प्रशासन आणि राजकीय मंडळींची धावपळ होऊन, गर्दी होण्याच्या शक्यतेने मुख्यमंत्री ठाकरे यांनी मंत्रालयात न जाता ‘मातोश्री’, ‘वर्षा’ आणि ‘सह्याद्री’मध्ये मंत्रिमंडळाच्या बैठका घेतल्या, जनतेशी संवाद ठेवला.

गेल्या वर्षी जुलै, ऑगस्टमध्ये साथ कमी झाल्यावर मंत्रालयातील कामांना वेग आला, तरीही ठाकरे मंत्रालयात आले नाहीत. या काळात लोकांची आणि खासगी कामे घेऊन येणाऱ्या आमदारांच्या मुख्यमंत्री ठाकरे यांच्या दालनात चकरा वाढल्या. अशा कामांसह महत्वाच्या बैठकांसाठी मुख्यमंत्र्यांनी मंत्रालयात येणे अपेक्षित असते. मात्र, ‘मुख्यमंत्री आज नाहीत’ असा ‘निरोप’ घेऊन आमदारांना सातव्या मजल्यावरून काढता पाय घ्यावा लागत असल्याच्या तक्रारी आहेत.

मुख्यमंत्री भेटत नसल्याचे छोटे ‘पोस्टर्स’ लावून आमदार रवी राणा यांनी तर आपली नाराजी उघड केली होती. त्यानंतर ऑक्टोबर, नोव्हेंबर डिसेंबर (२०२०) या काळात कोरोना संपल्याचे सांगत सर्व व्यवहार सुरळीत झाले, तरीही ठाकरे हे मंत्रालयाकडे फिरकले नसल्याने आश्चर्य व्यक्त होत आहे. दरम्यान, उपमुख्यमंत्री अजित पवार, गृहमंत्री दिलीप वळसे-पाटील, जलसंपदा मंत्री जयंत पाटील, सार्वजनिक बांधकाम खात्याचे मंत्री अशोक चव्हाण, ऊर्जामंत्री नितीन राऊत यांच्यासह सर्वच मंत्री आठवड्यातून किमान तीन-चार दिवस मंत्रालयातून आपले कामकाज करीत असल्याचे दिसून येत आहे. मात्र, मुख्यमंत्री ठाकरे हेच येत नसल्याची चर्चा आहे.

आदित्य ठाकरे यांचीही अनुपस्थिती

मंत्रालयातील सातव्या मजल्यावर मुख्यमंत्री उद्धव ठाकरे आणि त्यांचे चिरंजीव पर्यटनमंत्री आदित्य ठाकरे यांची दालने आहेत. मुख्यमंत्र्याप्रमाणेच आदित्यही मंत्रालयात येत नसल्याचे तेथील कर्मचारी सांगतात. त्यामुळे मंत्रालयाच्या जुन्या-नव्या इमारतीतील सातवा मजला वगळता इतर मजल्यांवर मंत्री, आमदार, अधिकारी आणि लोकांची कामासाठीची धावपळ पाहायला मिळते.

(संपादन- विराज भागवत)