राज्याच्या गृहविभागावर मुख्यमंत्र्यांची कुठल्याही प्रकारची नाराजी नाहीय. सर्वांना विश्वासात घेऊनच सगळे निर्णय होत असतात, त्यामुळं नाराजीचा प्रश्नच निर्माण होत नाहीय, असं स्पष्ट गृहमंत्री दिलीप वळसे-पाटील (Dilip Walse-Patil) यांनी व्यक्त केलं.

वळसे-पाटील पुढे म्हणाले, गृहविभागावर मुख्यमंत्र्यांची कुठल्याही प्रकारची नाराजी नाही आणि जर आमचा विभाग (गृहविभाग) कुठं कमी पडत असेल तर त्यावर आमचं लक्ष आहे. याच पार्श्वभूमीवर आज सायंकाळी 6 वाजता मी मुख्यमंत्र्यांची भेटणार आहे. प्रत्येकाला मत मांडण्याचा अधिकार आहे, त्यामुळं कोणीही आपली मतं मांडू शकतं. उद्या महाराष्ट्र पोलिसांच्या 'वन वन टू' कार्यक्रमाचा शुभारंभ होणार असल्याचंही त्यांनी सांगितलं.

माझा माझ्या सहकाऱ्यांवर पूर्ण विश्वास : उद्धव ठाकरे

गृहमंत्र्यांवर मुख्यमंत्री नाराज असल्याच्या वृत्ताचं स्वत: मुख्यमंत्री उद्धव ठाकरे (CM Uddhav Thackeray) यांनी खंडन केलंय. अशा बातम्या चुकीच्या आणि विपर्यास करणाऱ्या असून माझा माझ्या सहकाऱ्यांवर पूर्ण विश्वास आहे. ते उत्तम काम करीत आहेत, असं मुख्यमंत्री ठाकरेंनी स्पष्ट केलंय. मुख्यमंत्री सचिवालयाकडून या वृत्ताचं खंडन करण्यात आलंय. यात म्हटलंय की, गृहमंत्र्यांवर मुख्यमंत्री नाराज अशा बातम्या काही माध्यमांवर येत आहेत. अशा बातम्या चुकीच्या आणि विपर्यास करणाऱ्या असून माझा माझ्या सहकाऱ्यांवर पूर्ण विश्वास आहे आणि ते उत्तम काम करीत आहेत, असं मुख्यमंत्र्यांनी म्हटलंय.

संजय राऊतांनी आज नेमकं काय म्हटलं

आज संजय राऊतांनी केलेल्या एका वक्तव्यानंतर राजकीय वर्तुळात चर्चा रंगू लागल्या आहेत. राज्यात ईडीची कारवाई हे गृहखात्यावरचं आक्रमण आहे असं वक्तव्य आज संजय राऊतांनी केलं. त्यांचं हे वक्तव्य राष्ट्रवादीला उद्देशून होतं का? अशा राजकीय चर्चा सुरू झाल्या आहेत. राऊतांनी म्हटलं की, गृहखात्यानं अधिक सक्षम आणि कठोर होणं गरजेचं आहे. ज्या पद्धतीनं केंद्रीय तपास यंत्रणा घुसतात. हे खरंतर गृह खात्यावरचं आक्रमण आहे.