राज्यात सध्या निवडणुकांचं वारं वाहू लागलं आहे. राज्यसभा निवडणुकीची चुरस असतानाच आता विधान परिषदेच्या निवडणुकीसाठीचीही तयारी जोरदार सुरू आहे. प्रत्येक पक्ष आपलं सर्वस्व पणाला लावून या निवडणुकांच्या लढतीत उतरत आहेत. अशातच आता मुख्यमंत्री उद्धव ठाकरेंच्या एका निर्णय़ामुळे मंत्रिमंडळ विस्तार होणार की काय? अशा शक्यता निर्माण झाल्या आहे. (CM Uddhav Thackeray News)

शिवसेनेकडून (Shivsena) विधानपरिषदेसाठी सचिन अहिर आणि आमशा पाडवी यांच्या नावावर शिक्कामोर्तब झाल्याची माहिती आहे. मात्र यामुळे शिवसेनेतल्या मंत्रिपदावर असलेल्या उमेदवारांना मोठा धक्का बसला आहे. विशेषतः शिवसेनेचे ज्येष्ठ नेते सुभाष देसाईंना (Subhash Desai) उमेदवारी देण्यात आलेली नाही. त्यामुळे आता त्यांचं मंत्रिपद धोक्यात आलं आहे.

शिवसेना नेते सुभाष देसाई सध्या राज्याचा उद्योग, खाण आणि मराठी भाषा विभाग सांभाळत आहेत. विधान परिषदेसाठी जर त्यांना सदस्यत्व मिळालं नाही, तर सहा महिन्यांपेक्षा जास्त त्यांना मंत्रिपदावर राहता येणार नाही. त्यामुळे आता या उमेदवारीमुळे त्यांच्या मंत्रिपदाचं काय होणार? मुख्यमंत्र्यांना मंत्रिमंडळाचा विस्तार करायचा आहे का असे प्रश्न उपस्थित होत आहेत.