मुंबई : "निवडून नाही आलो तर हिमालयात जाईन", असे म्हणणाऱ्या भाजपच्या चंद्रकांत पाटील यांच्यासाठी राष्ट्रवादी काँग्रेसने 'थ्री टायर एसी' रेल्वेचे तिकीट बुक केले आहे; मात्र मी स्वत: निवडून नाही आलो तर हिमालयात जाईन असे म्हटल्याचे स्पष्टीकरण पाटील यांनी दिले आहे.

दोन वर्षांपूर्वी एका सभेत बोलताना चंद्रकांत पाटलांनी विरोधकांना आव्हान देताना 'कोल्हापुरातील कोणत्याही आमदाराने राजीनामा द्यावा आणि पोट निवडणूक लावावी निवडून नाही आलो तर राजकारणातून संन्यास घेईल आणि हिमालयात निघून जाईन' असे म्हटले होते. आता कोल्हापूर उत्तर पोट निवडणुकीत काँग्रेसच्या उमेदवार जयश्री जाधव (Jayshree Jadhav) यांचा १८ हजार मतांपेक्षा जास्त मताधिक्याने विजय झाला आहे. त्यांनी भाजपचे उमेदवार सत्यजीत कदम यांचा पराभव केला आहे. त्यामुळे पाटील यांचे जुने वक्तव्य पुन्हा समाजमाध्यमांवर प्रसारित होत आहे.

आता राष्ट्रवादी काँग्रेसच्यावतीने चंद्रकांत पाटलांसाठी (Chandrakant Patil) हरिद्वारचे थ्री टायर एसी तिकीट बुक करण्यात आले आहे. सध्या उन्हाळा सुरू असून त्यांना त्रास होऊ नये म्हणून एसी तिकीट बुक केल्याचे राष्ट्रवादीच्या (NCP) वतीने सांगण्यात आले आहे. तिकीटाबरोबर जेवणाचीही सोय करण्यात आली आहे.

कोल्हापुरात प्रतिष्ठेच्या ठरलेल्या कोल्हापूर उत्तर विधानसभा निवडणुकीचा निकाल आज लागला. यात महाविकास आघाडीच्या उमेदवार जयश्री जाधव यांचा विजय झाला आहे.

भाजपने (BJP) या जागेवर आपणच निवडून येणार असा विश्वास व्यक्त केला होता. परंतु भाजपला धक्का बसला आहे. चंद्रकांत जाधव यांच्या निधनानंतर या जागेवर पोट निवडणूक लागली होती. त्यात महाविकास आघाडीकडून त्यांच्या पत्नी जयश्री जाधव (Jayshree Jadhav) यांना उमेदवारी देण्यात आली होती आणि आता त्यांचा विजय झाला आहे.