काँग्रेसचे ज्येष्ठ नेते आणि इंटकचे प्रदेशाध्यक्ष माजी आमदार जयप्रकाश छाजेड यांचं निधन झालं आहे. नाशिक येथील खासगी रुग्णालयात त्यांच्यावर उपचार सुरू होते. उपचारादरम्यान, काल (मंगळवारी) रात्री उशिरा त्यांची प्राणज्योत मालवली. ते 75 वर्षांचे होते.

इंटकचे प्रदेशाध्यक्ष आणि काँग्रेसचे ज्येष्ठ नेते माजी आमदार जयप्रकाश छाजेड यांना प्रकृती अस्वास्थ्यामुळे नाशिकच्या खासगी रुग्णालयात उपचारासाठी दाखल करण्यात आलं होतं. उपचार सुरू असतानाच, मंगळवारी रात्री उशिरा त्यांची प्राणज्योत मालवली. त्यांचे पार्थिव अंत्यदर्शनासाठी काँग्रेस भवनमध्ये ठेवण्यात येणार आहे. आज (बुधवारी) संध्याकाळी नाशिक अमरधाम मध्ये त्यांच्या पार्थिवावर अंत्यसंस्कार करण्यात येणार आहेत.

हे ही वाचा : या महामार्गामुळं खरंच येईल 'समृद्धी'?

काँग्रेसचे ज्येष्ठ नेते असलेले जयप्रकाश छाजेड हे कामगार चळवळीत सक्रिय होते. इंटकचे ते प्रदेशाध्यक्ष होते. काँग्रेस पक्षात त्यांनी शहर आणि राज्य पातळीवर अनेक संघटनात्मक पदे भूषवली आहेत. नाशिकच्या राजकीय, सामाजिक आणि सांस्कृतिक चळवळीतील प्रमुख नेते म्हणून त्यांची ओळख होती.

विलासराव देशमुख मुख्यमंत्री असताना छाजेड यांची विधानपरिषदेवर आमदार म्हणून नियुक्ती झाली होती. त्यांच्या पश्चात त्यांची पत्नी आणि नाशिकच्या माजी उपमहापौर शोभा छाजेड, मुलगा प्रीतिश हितेंद्र आणि आकाश असा परिवार आहे.