सातारा : सध्याच्या सरकारमध्ये एक वाक्यता नसून चोऱ्या लपविण्यासाठी शिंदे, पवार गट सत्तेत गेला आहे. याबाबत लोकांच्या मनात चीड आहे. पाठीत खंजीर खुपसून ते सत्तेत सहभागी झाले आहेत, अशी टीका माजी मुख्यमंत्री पृथ्वीराज चव्हाण (Prithviraj Chavan) यांनी केली आहे.

दरम्यान, महाविकास आघाडीत काँग्रेस पक्ष (Congress) मोठा असल्याने पदाधिकाऱ्यांनी आता जनतेपर्यंत पोचावे, असे आवाहन त्यांनी केले. काँग्रेस भवनात जिल्हा काँग्रेस कार्यकारिणी आढावा बैठकीत चव्हाण बोलत होते. या वेळी जिल्हाध्यक्ष डॉ. सुरेश जाधव, जिल्हा निरीक्षक श्रीरंग चव्हाण, ज्येष्ठ नेते उदयसिंह पाटील, महिला जिल्हाध्यक्षा अल्पना यादव, नरेश देसाई, राजेंद्र शेलार, ॲड. विजयराव कणसे, धनश्री महाडिक, रजनी पवार आदी उपस्थित होते.

चव्हाण म्हणाले, ‘‘राज्यातील सध्याच्या परिस्थितीला भाजप जबाबदार आहे. अडीच वर्षांपूर्वी महाविकास आघाडी सरकार स्थापन झाले होते. त्या वेळी काँग्रेस छोटा पक्ष होता. आता परिस्थिती बदलली आहे. सत्तांतर झाले असून, महाविकास आघाडीत काँग्रेस पक्ष मोठा आहे. २०२४ च्या निवडणुकीसाठी महाराष्ट्र महत्त्वाचे राज्य आहे.

महाविकास आघाडी एकत्र लढली, तर भाजप हरणार हे नक्की आहे. कर्नाटकातील भाजपचा पराभव त्यांना सहन होत नाही. छत्तीसगड, राजस्थानमध्ये भाजप पराभव नक्की आहे. भाजपला महाराष्ट्र पाहिजे असल्यामुळे अमित शाह यांनी शिवसेना व त्यानंतर राष्ट्रवादी फोडली. भाजपविरोधात काँग्रेस लढणार आहे.

राज्यात वंचितमुळे अनेक ठिकाणी खासदार पडले आणि भाजपला त्याचा फायदा झाला आहे. राज्यातीलही राजकीय परिस्थिती समजून सांगण्यासाठी सध्या चांगली परिस्थिती आहे. त्यामुळे काँग्रेस पदाधिकाऱ्यांनी तळागाळापर्यंत पोचावे. भाजपला नवी व्यवस्था स्थापन करायची असून, संभाजी भिडेसारखा माणूस समाजात विष कालवत सुटला असल्याचे त्यांनी सांगितले.

डॉ. सुरेश जाधव म्हणाले, की जिल्ह्यातील दुष्काळी परिस्थिती माण, खटाव, फलटण व कोरेगाव याठिकाणी टँकर आणि चारा छावणींची गरज असून, यासाठी काँग्रेस लक्ष वेधणार आहे. संभाजी भिडे हे समाजातील वातावरण दूषित करत आहेत. सरकारचा कांदा निर्यात निर्णय योग्य नसल्याचे त्यांनी सांगितले. बैठकीस निवास थोरात, प्रताप देशमुख, जाकिर पठाण, बाबासाहेब कदम, संदीप चव्हाण आदींसह पदाधिकारी व कार्यकर्ते उपस्थित होते.