Prithviraj Chavan : सध्या देशात महागाई आणि बेरोजगारी मोठ्या प्रमाणात वाढत आहे. सरकारविरोधात काँग्रेस वेळोवेळी आंदोलन करताना दिसत आहे. मात्र, महागाई काही केल्या कमी होताना दिसत नाहीय. याच पार्श्वभूमीवर माजी मुख्यमंत्री पृथ्वीराज चव्हाण (Prithviraj Chavan) यांनी मोदी सरकारवर (Modi Government) निशाणा साधलाय.

मोदी सरकारचे अर्थव्यवस्थेवरील नियंत्रण सुटलेले आहे, ते गोंधळलेले आहेत. भरमसाठ करवाढ करून डिझेल-पेट्रोलच्या किंमती वाढवलेल्या आहेत. जीएसटीमध्ये वाढ करून आणखी करवाढ करून महागाई वाढवलेली आहे. आज अर्थव्यवस्था कोलमडलेली आहे. मोदी सरकारच्या चुकीच्या आर्थिक धोरणामुळं भारत देशात गेल्या 45 वर्षातील सर्वात मोठी बेरोजगारी आली असल्याचे काॅंग्रेसचे ज्येष्ठ नेते व माजी मुख्यमंत्री पृथ्वीराज चव्हाण यांनी सांगितले.

तांबवे (ता. कराड) येथे स्वातंत्र्याच्या अमृत महोत्सवानिमित्त काँग्रेस (Congress) पक्षाकडून ऑगस्ट क्रांती दिनी पदयात्रेचं आयोजन करण्यात आलं होते. त्यानंतर त्यांनी माध्यमांशी संवाद साधला. यावेळी पृथ्वीराज चव्हाण यांनी आज देशात महागाई, बेरोजगारीसह सरकारच्या चुकीच्या धोरणावर हल्लाबोल केलाय. देश चुकीच्या लोकांच्या हातात असून हुकुमशाही पध्दतीनं कारभार सुरू असल्यानं लोकशाहीला हानीकारक असल्याचं ते म्हणाले. आमदार चव्हाण म्हणाले, जे श्रीलंका, पाकिस्तान, युके आणि बांग्लादेशात झाले. तशी परिस्थिती भारतात येवू नये, यासाठी योग्य निर्णय घेणं गरजेचं आहे. संसदेत चर्चा होत नाही, त्यामुळं फार चिंतेचं वातावरण आपल्या देशात आहे, अशी भीती त्यांनी व्यक्त केलीय.