नाशिक - नाशिक रोडला (Nashik Road) ३६ वृक्षांच्या अवैध कत्तलीबाबत ठेकेदाराला महापालिकेने सुमारे २० लाख ३५ हजाराचा दंडाची नोटीस बजावली आहे. दरम्यान ज्या शिवसेनेच्या (Shivsena) नगरसेवकाच्या सांगण्यावरुन ही वृक्षतोड झाली त्याच्यावर त्यांच्या पर्यावरण मंत्र्याचा पक्षादेश धाब्यावर बसविला म्हणून कारवाई करावी अशी मागणी पर्यावरण प्रेमीनी केली आहे.

नाशिक रोड विभागातील वडनेर - विहीतगाव प्रभागातील वडनेर गेट भागात मागील आठवड्यात शनिवारी (ता.८) दुपारी वृक्षतोड होत असतांना स्थानीक नागरिकांनी ही बाब पर्यावरणप्रेमी व नाशिक कृती समितीच्या अश्वीनी भट, वैभव देशमुख यांच्यासह पाच सहा पदाधिकाऱ्यांनी प्रत्यक्ष घटनास्थळी जाउन संबधितांना परवानगी विषयी विचारणा केली मात्र संबधित कर्मचारी व ठेकेदारांनी उडवाउडवीची उत्तर देत, प्रभागाच्या नगरसेवकांना फोन करुन वृक्षतोड सुरु ठेवली त्यात, या भागातील सुमारे ३६ वृक्षांची कत्तल केली. त्यानंतर नगरसेवकाच्या सांगण्यावरुन स्मशानभूमीच्या ठेकेदारांपर्यत ही लाकड पोहोचली असा हा प्रकार आहे.

प्रतिबंधीत वृक्षांची कत्तल मुंबई-आग्रा महामार्गाच्या रुंदीकरणात (Mumbai Agra Highway) वट वृक्ष कत्तलीवरुन दाखल जनहित याचिकेत नाशिकला वड, पिंपळ उंबरासह काही झाडांच्या प्रजाती तोडण्यावर निर्बंधाचा आदेश झाला त्याची महापालिका कार्यक्षेत्रात अंमलबजावणीचे आदेश असतांना शहरात मात्र सर्रास अवैध वृक्षतोड होत असल्याच्या तक्रारी होतात. दरम्यान वडनेर येथील प्रकाराबाबत तक्रारदार आश्विनी भट व वैभव देशमुख यांनी उपनगर पोलिसात तक्रार करीत, या प्रकाराला वाचा फोडली त्यानुसार पंचनामा होउन संबधित वृक्ष तोड करणाऱ्या कर्मचाऱ्यांच्या जबाबात त्यांनी थेट नगरसेवक केशव पोरजे यांचे नाव घेतल्याची देशमुख यांनी सांगितले. त्यानुसार, बरीच खळखळ करीत अखेर महापालिकेने आज संबधित ठेकेदाराला सुमारे २० लाख ३५ हजाराचा दंडाची नोटीस बजावली.

एका बाजूला शिवसेनेचे पर्यावरण मंत्री पन्नास वर्षाहून आधीक वयाचे वृक्ष जगविण्यासाठी त्यांना हेरिटेज वृक्षाचा दर्जा दिला आहे. तर त्यांच्याच पक्षाचे नगरसेवक मात्र बिनदिक्कत वृक्षतोडीला प्रोत्साहान देत असतील. तर तो वनकायदे, महापालिकेचे पर्यावरण आणि त्यांच्या पक्ष नेत्यांचे आदेश धाब्यावर बसविण्याचे प्रकार आहे. त्यामुळे आदेश धाब्यावर बसविणाऱ्या सन्माननीय नगरसेवकांवर कारवाई व्हावी. - वैभव देशमुख (पर्यावरण प्रेमी, कर्तव्शील सामाजिक संस्था)

तोडलेले झाड वृक्षाचे वय मूल्यांकन

भेंडी २ ४२ ते ४४ १३७, ५००

मोहगणी १ ३० ते ३२ ५०.०००

अशोका ९ ३० ते ३२ ४,६२५००

पिंपळ १ २८ ते ३० ६०,०००

कटुलिंब १ २६ ते २८ ५००००

आंबा ३ २६ ते २८ १,८७, ५००

फणस १ ३३ ते ३५ ५०,०००

सिताफळ ३ ७ ते ८ ५३७५०

गुलमोहर ५ ३८ ते ४० ३,६८,७५०

शेवगा १ १० ते १२ ३७५००

विलायती चिंच ३ ३० ते ३२ १,७५,५००

काटेरी बाभूळ १ ३० ते ३२ ३७५००

काशीद १ ४० ते ४२ ८७५००

कायझेलिया पिनाटा १ ४० ते ४२ ८७,५००

पेरु १ ७ ते ८ १२५००

पिंपळ १ ५२ ते ५५ १ लाख

कडूलिंब १ ५२ ते ५५ ८७५००

-----

एकुण ३६ २० लाख ३५ हजार