ओमिक्रॉनचं सावट गडद झाल्यापासून राज्यात पुन्हा एकदा रुग्णवाढीचा सिलसिला सुरु झाला आहे. आज देखील रुग्णसंख्येमध्ये (Corona Report) मोठी वाढ झाल्याचं पहायला मिळालं आहे. राज्यात आज तब्बल ५० रुग्ण ओमिक्रॉनबाधित (Omicron) सापडले आहेत. त्यातील ३६ रुग्ण हे एकट्या पुण्यातले आहेत. या सगळ्या पार्श्वभूमीवर एक अशी बातमी समोर येत आहे, जी ऐकून तुम्ही हैराण व्हाल. मुंबईहून गोव्याला निघालेल्या कॉर्डेलिया एम्प्रेस क्रूझच्या एका क्रू सदस्याचा अहवाल पॉझिटिव्ह आला आहे. या एका सदस्यापायी आता सगळ्या प्रवाशांना थांबावं लागणार आहे.

या क्रूझमध्ये एकूण 2017 लोक होते. एक प्रवासी पॉझिटीव्ह आल्यामुळे आता उर्वरित 2016 लोकांची RT-PCR चाचणी करण्यात आली आहे. त्यांच्या अहवालानंतरच त्यांना क्रूझमधून उतरण्याची परवानगी दिली जाणार आहे. सध्यातरी पॉझिटिव्ह आलेल्या क्रू मेंबरला SOPs नुसार सुविधेत हलवण्यात आले आहे.

ही क्रूझ सध्या मुरगाव बंदरात आहे. आरटीपीसीआर चाचणीशिवाय कोणीही जहाजातून उतरू नये, अशा कडक सूचना प्रशासनाकडून देण्यात आल्या आहेत. या लोकांच्या चाचण्या घेण्यासाठी एक वैद्यकीय पथक पीपीई किटसह जहाजावर गेले होते. या जहाजात सुमारे 2000 प्रवासी आणि 13 क्रू मेंबर्स आहेत. एका सदस्यापायी सगळेच सध्या क्रूझवर अडकून आहे.

दरम्यान, आज २,०६९ रुग्ण बरे होऊन घरी परतले आहेत. राज्यात आजपर्यंत एकूण ६५,१२,६१० करोना बाधित रुग्ण बरे झाले आहेत. सध्या राज्यातील रुग्ण बरे होण्याचे प्रमाण (Recovery Rate) ९७.२१% एवढे झाले आहे. आज दिवसभरात ५० ओमिक्रॉन बाधित रुग्ण आढळले आहेत. त्यातील ३६ रुग्ण हे पुणे शहरातील आहेत. आजपर्यंत राज्यात एकूण ५१० ओमायक्रॉन विषाणू बाधित रुग्ण रिपोर्ट झाले आहेत.