Maharashtra Corona Updates : राज्यात सोमवारी कोरोनाचे नवीन २८ रुग्ण आढळून आलेले आहेत. त्यामुळे राज्यातील सक्रीय रुग्णांची संख्या १६८ पर्यंत गेलीय. सर्वाधिक केसेस मुंबईत आहेत. त्यापाठोपाठ ठाणे आणि पुण्यात रुग्णांची नोंद होतेय.

मुंबईमध्ये सध्या कोरोनाचे ७७ रुग्ण आहेत. तर ठाण्यात २९, रायगडमध्ये १७, पुण्यात २३ रुग्ण आढळून आलेले आहेत. कोरोनाचा नवीन व्हेरिएंट JN.1 मुळे संक्रमित झालेल्या १० रुग्णांची खात्री झालेली आहे. यामध्ये सर्वाधिक पाच रुग्ण ठाण्याचे आहेत.

रविवारी ५० रुग्णांची नोंद

रविवारी बीड जिल्ह्यामध्ये कोरोनाचे तीन रुग्ण आढळले आहेत. त्यामुळे जिल्हा प्रशासनाने नागरिकांना काळजी घेण्याचं आवाहन केलंय. अधिकाऱ्यांनी सांगितलं की, आम्ही विषाणूचे नमुने तपाणीसाठी पाठवलेले आहेत. जेएन. १ व्हेरिएंटच्या तपासणीसाठी पुण्याच्या लॅबला नमुने पाठवले आहेत. राज्यात रविवारी ५० नवीन केसेस आढळलेल्या आहेत. 'एबीपी न्यूज'ने हे वृत्त दिले आहे.

दुसरीकडे राज्याचे कृषीमंत्री तथा बीड जिल्ह्याचे पालकमंत्री धनंजय मुंडे यांनादेखील कोरनाची लागण झालेली आहे. त्यांनीच याबाबत सोशल मीडियातून पोस्ट करत माहिती दिली.

देशामध्ये रविवारी कोरोनाच्या नवीन व्हायरसचे ६५६ रुग्ण आढळून आलेले आहेत. देशात आतापर्यंत ३ हजार ७४२ नवीन कोरोना रुग्ण आढळून आलेले आहेत. शनिवारी ७५२ कोरोना रुग्ण आढळून आलेले होते. नवी दिल्ली, गोवा, गुजरात, कर्नाटक, केरळ, महाराष्ट्र, पंजाब, तमिळनाडू, तेलंगणा या राज्यांमध्ये नवीन कोरोना रुग्ण सापडले आहेत.