Jalna Crime News : गुटखा पुडी आणण्यावर केलेल्या मारहाणीत खून करणाऱ्या शंकर बाबूराव पवार (वय २०, रा. आदर्श कॉलनी, परतूर) याला जिल्हा व सत्र न्यायाधीश एस.डी. भगत यांनी बुधवारी (ता.२६) तीन वर्षांची शिक्षा आणि पंचवीस हजाराच्या दंडाची शिक्षा सुनावली आहे.

परतूर शहरात ता. २० ऑगस्ट २०१९ रोजी साडेतीन वाजेच्या सुमारास गुटखा पुडी आणण्याच्या कारणावरून पवन तिखे (वय २०) याच्या डोक्यात बॅट मारून जखमी केले. पवन तिखे यांच्यावर उपचार सुरू असताना त्याचा ता. २२ऑगस्ट २०१९ जालना शहरातील खाजगी रुग्णालयात मृत्यू झाला.

या प्रकरणी परतूर पोलिस ठाण्यात खून गुन्हा दाखल करण्यात आला होता. या प्रकरणी परतूर पोलिसांनी आरोपीला अटक करून या प्रकरणी न्यायालयात दोषारोपपत्र दाखल केले. सरकार पक्षातर्फे या प्रकरणी एकूण दहा साक्षीदारांची तपासणी करण्यात आली. यात प्रत्यक्षदर्शी साक्षीदार, उत्तरीय तपासणी करणारे वैद्यकीय अधिकारी, उपचार करणारे डॉक्टर, पंच साक्षीदार, तपास अंमलदार सहायक पोलिस निरीक्षक एम.एल. पवार यांची साक्ष महत्त्वाची ठरली.

न्यायालयाने दोन्ही बाजूचा युक्तिवाद ऐकल्यानंतर आरोपी शंकर बाबूराव पवार याला जिल्हा व सत्र न्यायाधीश भगत यांनी तीन वर्षांची शिक्षा आणि पंचवीस हजाराच्या दंडाची शिक्षा सुनावली आहे. या प्रकरणी सरकारी पक्षाच्या वतीने अतिरिक्त सरकारी अभियोक्ता भारत खांडेकर यांनी काम पाहिले.