सोलापूर : मार्डीतील शेतीच्या बांधावरून दाखल झालेला खटला सोलापूरच्या न्यायालयात सुरू असल्याने पुण्याहून सोलापुरात आलेली पीडित महिला १४ जून रोजी माजी महापौर मनोहर सपाटे यांच्या शिवपार्वती लॉजमध्ये राहिली. १७ जूनला पीडिता राहत असलेल्या खोलीत रात्री बारानंतर सपाटे आले. त्यावेळी त्यांनी जबरदस्तीने छेडछाड करीत अत्याचार करण्याचा प्रयत्न केला, अशी फिर्याद पीडितेने फौजदार चावडी पोलिसांत दिली. त्यावरून सपाटे यांच्याविरूद्ध विनयभंगाचा गुन्हा दाखल झाला आहे.

जबरदस्तीने खोलीत शिरलेल्या सपाटे यांनी पीडित महिलेला धरले. ‘सोडा मला, तुम्ही माझ्या वडिलांसारखे आहात’ म्हटल्यावर देखील त्यांनी सोडले नाही. त्यावेळी तू वेश्या आहेस म्हणून त्यांनी दमदाटी केली. ‘तु कोठेही तक्रार केली, कोणाला बोलली तरी मला काहीही फरक पडणार नाही, माझे वय जास्त असल्याने मला लगेच जामीन मिळतो’ असे म्हणून त्यांनी लज्जास्पद वर्तन केले. ते मोठे नेते असल्याने माझ्या बोलण्यावर कोणीही विश्वास ठेवणार नाही, त्यांचेच लॉज असल्याने सीसीटीव्ही फुटेजही नष्ट करतील म्हणून २४ जून रोजी स्टिंग ऑपरेशन केले. त्या दिवशी सव्वापाच ते सहाच्या दरम्यान सपाटे माझ्या खोलीत आले आणि त्यांनी पुन्हा तसेच कृत्य केले. तो प्रकार मोबाईलमध्ये टिपला गेला असून तो व्हिडिओ पीडितेने पोलिसांनाही दाखविला. त्यावरूनच सपाटेंविरूद्ध गुन्हा दाखल झाला असून पोलिसांनी लॉजमधील सीसीटीव्ही फुटेज जप्त केले आहेत. सपाटे हे सध्या शरदचंद्र पवार राष्ट्रवादी काँग्रेसचे नेते आहेत.

वय अन्‌ कायद्यातील शिक्षेमुळे अटक अशक्य

विनयभंगाचा गुन्हा दाखल झालेल्या मनोहर सपाटे यांचे वय ६५ वर्षांहून अधिक आहे. ज्येष्ठ नागरिक असल्याने त्यांना अटक करता येत नाही आणि विनयभंगाच्या कायद्यात सात वर्षांपेक्षा कमी शिक्षा असल्याचे देखील कारण आहे. पण, या गुन्ह्यात त्यांना नोटीस बजावून पोलिस तपास करून दोषारोपपत्र न्यायालयात दाखल करतील. त्यानंतर न्यायालयाच्या आदेशावर पुढील कारवाई अवलंबून असल्याचे ज्येष्ठ विधिज्ञांनी सांगितले.