गेल्या काही दिवसांमध्ये नेत्यांना धमकीचे फोन येण्याच्या घटनेमध्ये मोठ्या प्रमाणावर वाढ झाली आहे. यावेळी खासदार नवनीत राणा यांना जीवे मारण्याची धमकी देण्यात आली आहे. धमकीचे फोन येत असल्यामुळे नवनीत राणा यांनी तातडीने पोलीस ठाण्यात याबाबतची तक्रार देण्यात आली आहे. तसेच धमकी प्रकरणी तक्रार दाखल करुन सदर व्यक्तीचा तातडीने शोध घेण्याची मागणीही त्यांनी केली आहे.

आपल्या तक्रारीत नवनीत राणा यांनी म्हटलंय की, गेल्या 4 ते 5 दिवसांपासून 088055 41949 संपर्क क्रमांकावरून विठ्ठल राव नामक व्यक्तीचा मला कॉल येत होता. या व्यक्तीने मी तिवसामधून बोलतो आहे असं सांगितलं. त्याचबरोबर त्याने जीवे मारण्याच्या धमक्या दिल्या.

'तु गर्दीच्या ठिकाणी जाते ना त्या ठिकाणी मी कधीही धारधर चाकुने वार करणार ते तुला माहितीही पडणार नाही'. त्याचबरोबर फोनवर अश्लील शिवीगाळ करुन खालच्या भाषेचा वापर केला, असंही नवनीत राणांनी आपल्या तक्रारीत म्हटलं आहे.

अशा माथेफिरूला त्वरित जेरबंद करून त्याच्यावर कठोर कारवाई करावी करावी. त्याच्यावर फौजदारी गुन्हे दाखल करावे अशी तक्रार खासदार नवनीत राणा यांच्याकडून त्यांच्या स्वीय सहाय्यकांनी राजापेठ पोलीस स्टेशनमध्ये दिली आहे. राजापेठ पोलिसांनी धमकी देणाऱ्या व्यक्तीचा तपास सुरू केला आहे.