सोलापूर : पावसाळ्याच्या शेवटी ११.२८ टक्के (१२३.२८ टीएमसी) भरलेले उजनी धरण सध्या ९५ टक्क्यांवर आले आहे. सध्या धरणातील एकूण पाणीसाठा ११५.४८ टीएमसीपर्यंत आहे. सध्या सोलापूर शहरासाठी भीमा नदीतून पाणी सोडण्यात आले असून ते पाणी साधारणत: ८ जानेवारीला बंद केले जाणार आहे. औज बंधाऱ्यात पाणी पोचल्यानंतर धरणाचे दरवाजे बंद केले जातील, असे लाभक्षेत्र विकास प्राधिकरणाच्या अधिकाऱ्यांनी सांगितले.

जिल्ह्यातील शेतकऱ्यांना यंदा जानेवारी, मार्च व मे अशा तीन टप्प्यात तीनवेळा पाणी सुटेल, अशी आशा आहे. सध्या शेतकऱ्यांना रब्बी पिकांसाठी पाण्याची गरज असून तशी मागणी देखील त्यांनी कळविली आहे. मात्र, शेतीला पाणी सोडण्यासंबंधीचा निर्णय तथा पाण्याच्या आवर्तनांचे नियोजन कालवा सल्लागार समितीच्या बैठकीत अपेक्षित आहे.

राज्याच्या मंत्रिमंडळाचा विस्तार झाला, खातेवाटप झाले, तरीपण कालवा सल्लागार समितीची बैठक कधी, याचा निर्णय झालेला नाही. जिल्ह्याच्या पालकमंत्र्यांच्या अध्यक्षतेखाली ही बैठक होते, पण पालकमंत्री अजून निश्चित नसल्याने ही बैठक लांबल्याचे जलसंपदा विभागाचे अधिकारी सांगत आहेत. पालकमंत्र्यांच्या निवडी न झाल्यास आता थेट जलसंपदा मंत्री राधाकृष्ण विखे पाटील यांची मान्यता घेऊन शेतीला जानेवारीच्या दुसऱ्या आठवड्यात पाणी सोडले जाईल, असे अधिकाऱ्यांनी ‘सकाळ’शी बोलताना सांगितले.

जिल्ह्यात १०० टक्के पेरणी, आता पाण्याची प्रतीक्षा

सोलापूर जिल्ह्यात साडेचार लाख हेक्टरवर रब्बीची पेरणी झाली असून त्यात ज्वारी, मका, गहू या प्रमुख पिकांचा समावेश आहे. त्या पिकांना आता पाण्याची गरज असून हंगामी बागायत किंवा कोरडवाहू क्षेत्रावरील पिकांसाठी उजनीच्या पाण्याची प्रतीक्षा आहे. दुसरीकडे अनेकांच्या शेतातील ऊस कारखान्याला गेला असून त्यांनीही उजनीतून पाणी सोडण्याची मागणी केली आहे. १५ जानेवारीपूर्वी शेतीसाठी रब्बीचे पहिले आवर्तन सुटेल, असे अधिकारी सांगत आहेत. मात्र, कालवा सल्लागार समितीची बैठकच न झाल्याने त्यांनीही आता तोंडावर बोट ठेवल्याची स्थिती आहे.

धरणातील सध्याचा पाणीसाठा

• एकूण पाणी

• ११५.४८ टीएमसी

• उपयुक्त पाणीसाठा

• ५१.८४ टीएमसी

• पाण्याची टक्केवारी

• ९५.४२ टक्के

• भीमा नदीत सोडलेला विसर्ग

• ६००० क्युसेक