मुंबई : राज्याच्या अर्थसंकल्पीय अधिवेशनाच्या (Maharashtra Budget Session) पहिल्याच दिवशी सभागृहात प्रचंड गदारोळ झाला. राज्यपालांच्या अभिभाषणावेळी विरोधकांनी घोषणाबाजी केली. त्यानंतर राज्यपालांनी (Governor Koshyari) सभागृहातून काढता पाय घेतला. यावरूनच राज्याचे विरोधी पक्षनेते देवेंद्र फडणवीस (Devendra Fadnavis) यांनी प्रतिक्रिया दिली असून आम्ही राज्यपालांचं भाषण का ऐकावं? असं फडणवीस म्हणाले.

राज्यपाल कोश्यारी सरकारच्यावतीने भाषण करण्यासाठी आले होते. त्यामुळे सदस्यांच्या भावना अतिशय तीव्र होत्या. तुम्ही सरकारच्या वतीने भाषण करताय. पण हे दाऊद समर्पित सरकार असताना आम्ही तुमचं भाषण आम्ही का ऐकायचं? असं सदस्यांचं म्हणणं होतं. त्यामुळे नवाब मलिकांचा राजीनामा घेतला पाहिजे, हीच मागणी सर्व सदस्यांनी सर्वांनी केली, असं फडणवीस म्हणाले.

सत्ताधाऱ्यांकडून राज्यपालांचा अपमान - फडणवीस

राज्यपाल सभागृहात राष्ट्रगीतावेळी उभे राहिले. पण, सत्ताधाऱ्यांनी घोषणाबाजी केली. त्यामुळे राज्यपाल राष्ट्रगीताला न थांबता निघून गेले. याला सत्ताधारी जबाबदार आहेत. सत्ताधाऱ्यांनी राज्यपालांचा अपमान केला, असा आरोपही देवेंद्र फडणवीसांनी केला.

मलिकांना वाचवण्याचा प्रयत्न; हे दाऊद समर्पित सरकार - फडणवीस

मलिकांनी कवडीमोल भावात जमीन घ्यायची आणि जमिनीचा ताबा मिळवून दिल्याबाबत दाऊदच्या बहिणीला पैसे दिले. मुंबई अस्थिर करण्यासाठी दाऊदला दिलेला पैसा वापरण्यात आला. आता हे प्रकरण उघडकीस आलं आहे. याचप्रकरणात मंत्री नवाब मलिकांना अटक झाली आहे. त्यांना जर सरकार समर्थन देत असेल तर हे दाऊद समर्पित सरकार आहे, असं आम्ही म्हणू. संजय राठोडांचा लगेच राजीनामा घेतला. पण, नवाब मलिकांना का वाचवण्यात आलं आहे. राज्यपालांचं अभिभाषण असेल किंवा सभागृह असेल प्रत्येकवेळी आम्ही मलिकांच्या राजीनाम्याची मागणी लावून धरली आहे. नाना पटोले असंही म्हणू शकतात, की आम्ही दाऊदचे समर्थक आहोत. पण, आम्ही दाऊदच्या माणसांना पाठिंबा देऊ शकत नाही, असंही फडणवीस म्हणाले.