राष्ट्रवादीचे आध्यक्ष शरद पवार (Sharad Pawar) यांच्या सिल्वर ओक या बंगल्यावर एसटी कर्मचाऱ्यांनी केलेल्या हल्ल्यानंतर राज्यातील राजकारण चांगलेच तापले आहे. राज्यातील सर्व पक्षांच्या नेत्यांकडून या प्रकरणाचा निषेध केला जात आहे. दरम्यान एसटी कर्मचाऱ्यांना भडकावल्याच्या ठपका ठेवत कर्मचाऱ्यांचे वकील गुणरत्न सदावर्ते यांना अटक करण्यात आली असून त्यांना दोन दिवसांची कोठडी सूनावण्यात आली आहे.

दरम्यान गुणरत्न सदावर्ते यांच्या पत्नी यांच्याकडून गृहमंत्री दिलीप वळसे पाटील आणि शरद पवार यांच्यावर आरोप करण्यात येत आहेत, त्यांनी जीवाला धोका असल्याचा गंभीर आरोप केला होता. दरम्यान या आरोपांवर राज्याचे गृहमंत्री दिलीप वळसे पाटील यांनी स्पष्टीकरण दिलं आहे.

सतत असा आरोप करत आहे की गृहखातं जाणून बुजून हे करत आहे, आमच्या जिवाला धोका आहे. शरद पवार आणि तुमचं नाव घेत आहेत असे विचारले असता, वळसे पाटील म्हणाले की, त्यांनी काय आरोप करावा हा त्यांचा प्रश्न आहे, परंतु त्यांच्या आरोपांमध्ये काहीही तथ्य नाही. त्या असंच अंदाजपचे काहीतरी शरद पवार आणि माझ्यावर आरोप करतायत, त्यांना अशी सवय आहे तक्रारी आरोप करुन लोकांच्या समोर राहण्याचा प्रयत्न करायचा, त्यांचे सगळे आरोप मी फेटाळून लावतो" असे गृहमंत्री वळसे पाटील म्हणाले.

काल कायदा सुव्यवस्थेत ज्या त्रुटी दिसून आल्या त्याला जबाबदार असलेल्या सर्वांवर कारवाई होईल असे त्यांनी सांगितले. एसटी कर्मचाऱ्यांनी आता सहकार्य करावे. कर्मचाऱ्यांनी शांतता ठेवावी, राज्य सरकारने अधीच भूमिका स्पष्ट केली आहे, विलगीकरणाची मागणी सोडता सगळ्या मागण्या पुर्ण केल्या आहेत. त्यामुळे कोणाच्यातरी भडकावण्यावर विश्वास ठेवू नये. तपास करुन पुढची कारवाई केली जाईल, असे देखील वळसे पाटील यांनी स्पष्ट केलं.