शिवसेनेत फूट पडून शिंदे गट आणि ठाकरे गट निर्माण झाला. त्यानंतर बंडखोर नेत्यांनी राष्ट्रवादी काँग्रेसच्या डोक्यावर खापर फोडत उद्धव ठाकरे यांच्यावरही निशाणा साधला होता. शिवसेना राष्ट्रवादी काँग्रेसकडे गहाण ठेवली आहे, असा आरोपही शिंदे समर्थक आमदारांकडून वारंवार करण्यात येतो. ठाकरे गटाचे नेते हे आरोप वारंवार फेटाळतात. पण पहिल्यांदाच शिवसेना ठाकरे गटाच्या नेत्याने हे मान्य केले. सोशल मीडियावर व्हायरल होणाऱ्या व्हिडिओच्या माध्यमातून ही बाब समोर आली आहे.

यावर बोलताना अजित पवार यांनी जयंत पाटलांच्या व्यक्तव्याची सारवासारव केली आहे. विरोधी पक्षनेते अजित पवार म्हणाले की, ठाकरे गटाची शिवसेना ही राष्ट्रवादीची शिवसेना असल्याचं जयंत पाटीलांनी गमतीने म्हटलं होतं. बाळासाहेब ठाकरे यांची शिवसेना ही मराठी लोकांकरिता काढलेली संघटना आहे. ती सर्वदूरपर्यंत महाराष्ट्राभरात पोहचली आहे. त्यांची धोरणं, विचार बाळासाहेब ठाकरे यांनी सर्वदूर पोहचवले आहेत. ती शिवसेना बाळासाहेब ठाकरे यांची आहे. बाळासाहेब ठाकरे यांच्यानंतर शिवसेना संघटनेचे नेतृत्व उद्धव ठाकरे यांच्याकडं आहे. तसंच युवासेनेचं नेतृत्व आदित्य ठाकरे करतात, असं अजित पवार म्हणाले आहेत.

पुढे बोलताना अजित पवार म्हणाले की, जयंत पाटील यांच्या वक्तव्याचा काही वेगळा अर्थ काढू नका. त्यांचा तसा अजिबात म्हणण्याचा हेतू नसेल. कारण माझी, त्यांची भेट नाही. परंतु, त्यांना याबद्दल काय वाटतं. ते आणि आम्ही बघू, असंही अजित पवार यावेळी बोलताना म्हणाले आहेत.

काय म्हणाले होते जयंत पाटील?

राष्ट्रवादीचे नेते जयंत पाटील आणि ठाकरे गटाचे नेते भास्कर जाधव यांच्यादरम्यान झालेल्या संवादाचा एक व्हिडिओ व्हिडिओ सोशल मिडियावर चांगलाच व्हायरल होत आहे. पत्रकार परिषदेत जयंत पाटील भास्कर जाधवांना म्हणतात.आमची शिवसेना, राष्ट्रवादीची शिवसेना, त्यावर भास्कर जाधव हसतात आणि होकार देतात. त्या वक्तव्याचा पुनरुच्चारही करतात. मनसे नेते संतोष धुरी यांनी हा व्हिडिओ सोशल मीडियावर पोस्ट केला आहे. राष्ट्रवादी काँग्रेसकडे गहाण ठेवलेली शिवसेना, आमची शिवसेना राष्ट्रवादी काँग्रेसची शिवसेना.. पोटातलं ओठावर आलंच, असे म्हणत धुरी यांनी भास्कर जाधव यांच्यावर निशाणा साधला आहे.