मुंबई : राज्यात महाविकास आघाडीच्या सरकार स्थापनेला तिसरं वर्ष सुरू आहे. पण, या तीन वर्षांत या सरकारमधील काही मंत्री वादात सापडलेत. अनेकांच्या मागे ईडीचा ससेमिरा लागला. ठाकरे सरकारच्या (Uddhav Thackeray Government) दुसऱ्या वर्षात पहिल्या मंत्र्याला ईडीने अटक केली. त्यानंतर आज तिसऱ्या वर्षात दुसऱ्या मंत्र्यांना अटक करत ईडीने महाविकास आघाडी सरकारला डबल दणका दिला आहे. (ED Arrested Two Minister of Thackeray Government)

महाविकास आघाडी सरकारमधील अनेक नेत्यांमागे तपास यंत्रणांच्या चौकशीचा फेरा लागला. यामध्ये अनिल देशमुख, अनिल परब, खासदार भावना गवळी, उपमुख्यमंत्री अजित पवारांचे निकटवर्तीय, संजय राऊतांचे निकटवर्तीय या सर्वांवर ईडीने छापेमारी केली. मात्र, यामध्ये विकेट पडली ती अनिल देशमुखांची. अनिल देशमुखांवर शंभऱ कोटी वसुलीचे आरोप झाले आणि त्यांच्यामागे ईडी, सीबीआय, इन्कम टॅक्स या तपास यंत्रणांची चौकशी लागली. अनेक दिवसांपासून गायब असलेले अनिल देशमुख १ नोव्हेंबर २०२१ ला चौकशीसाठी ईडी कार्यालयात दाखल झालेत. त्यानंतर अनिल देशमुखांची १२ तासांपेक्षा अधिक वेळ चौकशी करत त्यांना २ नोव्हेंबरला मध्यरात्री अटक करण्यात आली. सध्या अनिल देशमुख तुरुंगात आहेत.

तिसऱ्या वर्षात दुसऱ्या मंत्र्याला अटक -

नवाब मलिकांनी ईडीसह एनसीबीचे माजी अधिकारी समीर वानखेडेंवर सातत्याने आरोप केले. वानखेडेंचे अनेक घोटाळे बाहेर काढणार असल्याचे सांगितले. त्यानुसार वानखेडेंची चौकशी देखील झाली. हे आरोप-प्रत्यारोप सुरू असताना माझ्यावर ईडीची कारवाई होईल, असं भाकीत मलिकांनी वर्तविलं होतं. त्यानुसार आज मध्यरात्री मलिकांना त्यांच्या घरातून ईडीच्या अधिकाऱ्यांनी ताब्यात घेतलं. तब्बल ८ तास चौकशी केल्यानंतर ईडीनं मलिकांना अटक केली. एक मंत्री तुरुंगात असताना दुसऱ्या मंत्र्यांना अटक केल्यानं महाविकास आघाडी सरकारवर मोठं संकट ओढवलं आहे.

आतापर्यंत या नेत्यांमागे ईडीचा ससेमिरा -

आतापर्यंत शिवसेनेच्या चार नेत्यांना ईडी चौकशीसाठी समन्स बजावण्यात आले. तसेच संजय राऊतांच्या कुटुंबीयांच्या मागे देखील ईडी चौकशीचा फेरा लागला आहे. सध्या शिवसेनेचे चार नेते ईडी चौकशीच्या फेऱ्यात अडकले आहेत. यामध्ये मंत्री अनिल परब, आनंदराव अडसूळ, प्रताप सरनाईक आणि खासदार भावना गवळींच्या समावेश आहे.

राष्ट्रवादीच्या नेत्यांमागेही तपास यंत्रणा -

ईडीने राष्ट्रवादीचे अध्यक्ष शरद पवार यांना महाराष्ट्रातील विधानसभा निवडणुकांपूर्वी चौकशीसाठी बोलावले होते. मी चौकशीसाठी जाणार, असं पवारांनी सांगितलं होतं. पण, शेवटी ईडीने चौकशी करणार नाही, असं म्हटलं. त्यानंतर अनिल देशमुखांवर ईडीने कारवाई केली. तसेच उपमुख्यमंत्री अजित पवार यांच्या निकटवर्तीयांवर देखील ईडी आणि आयकर विभागाने छापेमारी केली. एकनाथ खडसेंची देखील ईडीकडून चौकशी करण्यात आली.