नवी दिल्ली - शिवसेनेचे नेते एकनाथ शिंदे 40 हून आमदार सोबत घेऊन बाहेर पडले. त्यानंतर त्यांनी भाजपसोबत मिळून सरकार स्थापन केलं. तसेच मुख्यमंत्रीपदी विराजमान झाले आहे. मात्र शिवसेनेच्या आमदारांना घेऊन ते पक्षातून बाहेर गेल्यामुळे मोठा पेच निर्माण झालं असून हे प्रकरण आता सर्वोच्च न्यायालयात आहे. त्यातच आता शिवसेना कोणाची याचे पुरावे 8 ऑगस्ट रोजी दुपारी 1 वाजेपर्यंत सादर करा, असे आदेश केंद्रीय निवडणूक आयोगाने दिल्याचं सुत्रांनी सांगितलं. (Shivsena Ownership news in marathi)

मुख्यमंत्री एकनाथ शिंदे शिवसेना पक्षावर दावा करण्याची शक्यता व्यक्त करण्यात येत असतानाच निवडणूक आयोगाचे आदेश आले आहे. तर दुसरीकडे एकनाथ शिंदे वारंवार हेच सांगतात की, आम्ही शिवसेनेतच असून शिवसैनिक आहोत. तर शिंदे गटातील आमदार देखील हेच सांगतात.

निवडणूक आयोगाच्या निर्देशानंतर शिवसेनेचे खासदार अरविंद सावंत यांची प्रतिक्रिया आली आहे. सावंत म्हणाले की, शिवसेना कोणाची आहे, यासंदर्भातील पुरावे आमच्याकडे आहे. त्यामुळे ''दुध का दुध पाणी का पाणी होईल'', असंही सावंत यांनी म्हटलं.

दरम्यान शंभुराज देसाई म्हणाले की, निवडणूक आयोगाने मागितलेली कागदपत्रे आणि बहुमताचे पुरावे आम्ही मुदतीत नक्कीच सादर करू. तसेच निवडणूक आयोग आणि कायद्यावर आमचा विश्वास असल्याचं त्यांनी नमूद केलं.