पंढरपूर : राज्यातील पूरग्रस्त भागातील जिल्हाधिकाऱ्यांना मदतीचे आदेश देणारा मुख्यमंत्री एकनाथ शिंदेंचा (Eknath Shinde) फोन हा सध्या चर्चेचा विषय ठरला आहे. पूरग्रस्तांना मदत पुरवण्याबाबत तातडीने कारवाई करा, स्वत: लक्ष द्या, असे आदेश शिंदेंनी दिले होते. फोनवरुन आदेश देतानाची शिंदेंची व्हिडिओ क्लिप व्हायरल झाले असून या ‘शिंदे पॅटर्न’बाबत मुख्यमंत्र्यांनी त्यांच्या खास शैलीत उत्तर दिलंय.

आज (रविवार) सकाळी पंढरपूर (Pandharpur) येथे पत्रकारांनी सरकारी कामकाजाचा पॅटर्न बदलणार का, असा प्रश्न विचारला. यावर शिंदे म्हणतात, राज्यात सर्वसामान्यांचं राज्य आहे. आता कोणावरही अन्याय होणार नाही. तसेच कोणी वंचितही राहणार नाही. आता फाईल लालफितीत अडकणार नाही. जागेवरच काम होतील. सर्वसामान्यांना न्याय मिळवून देणारं सरकार आहे.

आता लिखाण काम बंद होईल. तपास करुन अहवाल देण्याच्या प्रक्रियेत वेळ जातो. आता थेट फोन करुन जिल्हाधिकाऱ्यांना कार्यवाही करा असे आदेश देणार, असं एकनाथ शिंदे यांनी विश्वासदर्शक ठरावाच्यावेळी सांगितले होते. दिल्ली दौऱ्यात शिंदेंनी हे प्रत्यक्षात आणल्याचे दिसले. दिल्लीत पंतप्रधान, राष्ट्रपती, गृहमंत्री यांच्याशी भेटीगाठी सुरू असताना शिंदेंनी प्रवासादरम्यान कारमधून थेट जिल्हाधिकाऱ्यांना फोन केले होते. पूरगस्त भागातील जिल्हाधिकाऱ्यांना त्यांनी फोन केल्याचे व्हिडिओ सोशल मीडियावर व्हायरल झाले होते.

निवडणूक पुढे ढकलण्याची विनंती करणार

राज्यातील नगरपरिषद निवडणुका पुढे ढकलण्यासंदर्भात निवडणूक आयोगाला विनंती करणार असल्याचे शिंदेंनी सांगितले. पावसाळ्यात निवडणूक घेणे अशक्य आहे. पावसामुळे मर्यादा आहेत. सध्या राज्यातील अनेक जिल्ह्यांमध्ये अतिवृष्टी झाली असून अशा परिस्थितीत सर्व यंत्रणा पूरस्थिती नियंत्रणात आणण्यासाठी वापरावी लागते. त्यामुळे निवडणूक पुढे ढकलावी अशी विनंती आयोगाला विनंती करणार आहोत, असा पुनरुच्चार त्यांनी केला.