मुख्यमंत्री एकनाथ शिंदे यांच्या गटात असलेले ५० आमदार सध्या गोव्यामध्ये आहेत. हे आमदार उद्या मुंबईत येणार आहेत. त्याआधी या गटाचे प्रवक्ते दीपक केसरकर यांनी पत्रकार परिषद घेतली आहे. एकनाथ शिंदेंवर शिवसेनेने केलेल्या कारवाईवर त्यांनी उत्तर दिलं आहे. (Shivsena News)

एकनाथ शिंदे (Eknath Shinde) हे आता राज्याचे प्रमुख आहेत, याची आठवण केसरकर (Deepak Kesarkar) यांनी करुन दिली. तसंच एकनाथ शिंदेंना नेतेपदावरुन काढून टाकणार शिवसेनेने (Shivsena) जाहीर केलेलं पत्र हे आक्षेपार्ह आहे. त्याला आव्हान दिलं जाईल, असंही केसरकरांनी सांगितलं आहे. माध्यमांशी बोलताना ते म्हणाले की, एकनाथ शिंदेंवर शिवसेनेने केलेल्या कारवाईच्या विरोधात कायदेशीर पाऊल आपण उचलणार असून शिवसेनेला रितसर उत्तर पाठवणार आहोत. अशा तऱ्हेची कृत्ये लोकशाहीसाठी शोभादायक नाही.

शिवसेनेवर टीका

शिवसेनेकडून कार्यकर्त्यांचं प्रतिज्ञापत्र तयार करुन घेतलं जात असल्याचं दीपक केसरकरांनी सांगितलं आहे. ते म्हणाले की, अनेक कार्यकर्त्यांकडून अँफिडेव्हिट करण्याची मोहिम चाललीये. पण तशी पद्धत नाही, हे कोणतंही बंधन नाही, प्रेमाचं बंधन लागतं. आजही आमच्या हातात शिवबंधन आहे. बाळासाहेबांची (Balasaheb Thackeray) निशाणी म्हणून आम्ही ते बांधलं आहे. अशा प्रकारे प्रतिज्ञापत्र तयार करणं हे दिशाभूल करण्याचं काम आहे. कार्यकर्त्यावर गैरविश्वास दाखवणं हे चुकीचं आहे. अॅफिडेव्हिट केल्यानं बंधन येत नाही, शिवबंधन हे नातं अजूनही कायम आहे आणि ते अबाधित राहील.