मुंबई : कोलकात्यात निर्भला प्रकरणासारखं भीषण प्रकरण घडलं असून यामध्ये एका महिला डॉक्टरची अमानुषपणे अत्याचार करुन हत्या करण्यात आली. यामुळं देशभरातील डॉक्टरांमध्ये संतापाची लाट असून अनेक राज्यांमध्ये निषेध आंदोलनं केली जात आहेत. या आंदोलनाला मंगळवार (१३ ऑगस्ट) पासून सुरुवात झाली असून आज याचा दुसरा दिवस आहे. यामुळं रुग्णालयातील ओपीडी सेवा पूर्णपणे ठप्प झाल्या आहेत. यामुळं रुग्णांचे मात्र हाल होत आहेत.

महाराष्ट्रात आंदोलन कुठे?

राज्यातील सर्व शासकीय वैद्यकीय महाविद्यालयातील ‘मार्ड’ (महाराष्ट्र असोसिएशन ऑफ रेसिडेंट डॉक्टर्स) हे निवासी डॉक्टर संपावर गेले आहेत. महाराष्ट्रात कालपासून मुंबई-पुण्यात निवासी डॉक्टरांनी दिवसभर आंदोलन केलं. तसंच आज मुंबईत सायन रुग्णालयाबाहेर आंदोलन सुरु आहे. त्याचबरोबर पुण्यात ससून रुग्णालयाबाहेर देखील डॉक्टरांचं आंदोलन सुरु आहे. ससूनमधील ५६६ निवासी डॉक्टरांपैकी १८० डॉक्टर संपावर आहेत.

‘बीजे’ मेडिकल कॉलेजच्या आवारात सकाळी निवासी डॉक्टरांनी मंगळवारी दंडाला काळ्या फिती लावून निदर्शने केली. तसेच तातडीच्या सेवा वगळता सर्व डॉक्टर संपावर गेले आहेत. त्यामुळे रुग्णसेवा काही प्रमाणात विस्कळित झाली आहे. वॉर्डमध्येही निवासी डॉक्टर उपस्थित होते. परंतु त्यांची संख्या कमी होती. याचबरोबर रुग्णालयाने डॉक्टरांची कमतरता भरून काढण्यासाठी क्लिनिकल, पॅराक्लिनिकल स्टाफ आणि शिक्षकांनाही रुजू केले होते. परंतु निवासी डॉक्टरांच्या अभावी नियोजित शस्त्रक्रिया पुढे ढकलाव्या लागल्या. मात्र तातडीच्या शस्त्रक्रियांना प्रधान्य देण्यात आले, अशी माहिती प्रशासनाने दिली.

त्याचबरोबर आसाम, पश्चिम बंगाल, तेलंगाणा या राज्यांमध्येही सध्या डॉक्टरांचं निषेध आंदोलन सुरु आहे. यावेळी डॉक्टरांच्या सुरक्षेविषयी विशेष मागण्या त्यांच्याकडून करण्यात येत आहेत. हातात फलक घेऊन त्यावर कोलकात्यातील महिला डॉक्टरला न्याय मिळवून द्या, डॉक्टरांच्या सुरक्षेची हमी द्या, नो ड्युटी विथाऊट सिक्युरिटी, न्यायाला उशीर म्हणजे नाय नाकारणे, सुरक्षा ही डॉक्टरांची प्राथमिकता अशा घोषणा यावेळी या डॉक्टरांनी दिल्या.