समृद्धी महामार्गावर अपघातांचं प्रमाण दिवसेंदिवस वाढताना दिसुन येत आहे. त्यामुळे समृद्धी महामार्ग मृत्यूचा सापळा बनतोय की काय असा प्रश्न उपस्थित होत आहे. समृद्धी महामार्गावर आज झालेल्या एका अपघातात पाच जणांचा दुर्दैवी मृत्यू झाला आहे. वेगवान कार उलटून हा अपघात झाला आहे.

मिळालेल्या माहितीनुसार, कार औरंगाबादहून शेगावच्या दिशेने जात होती. गाडीत एकूण 9 प्रवासी होते. मेहकरजवळ सिवनी पिसा गावाजवळ नागपूर कॉरिडॉरवर गाडीचा अपघात झाला. अपघातात 2 मुले 3 महिलांचा मृत्यू झाला आहे. तर 7 गंभीर जखमी झाल्याची माहिती आहे. जखमींना उपचारासाठी रुग्णालयात दाखल करण्यात आलं आहे.

अपघाताची माहिती मिळाल्यानंतर पोलीस घटनास्थळी दाखल झाले होते. जखमींवर मेहकर येथील रुग्णालयात उपचार सुरू आहेत. अपघातामुळे वाहतुकीचा वेगही मंदावला होता. अपघाताच्या ठिकाणी बघ्यांची गर्दीही मोठ्या प्रमाणात जमली होती.