चिपळूण : १९ वर्षांनंतर आलेल्या अधिक मासामुळे यंदा गणपती बाप्पाचे (Ganesh Chaturthi 2023) आगमन गतवर्षीपेक्षा १९ दिवसांनी लांबणार आहे. गेल्यावर्षी ३१ ऑगस्टला गणेशाचे आगमन झाले होते. यंदा १९ सप्टेंबरला गणेशाचे आगमन होणार आहे.

दर तीन वर्षांनी अधिक मास येतो. यंदा हा मास श्रावण महिन्यात (Shravan month) आला असून, १९ वर्षांनंतर हा योग आला आहे. हिंदू पंचांगानुसार (Hindu Panchang) यंदा मराठी वर्ष १३ महिन्यांचे असणार आहे. यंदा श्रावण महिन्यात अधिक महिना आला आहे. त्यामुळे श्रावण महिना तब्बल ५९ दिवसांचा असणार आहे.

त्यामुळे यावर्षी श्रावणाचे दोन महिने मानले जाणार आहेत. त्यामुळे यंदा श्रावणातील धार्मिक व शुभकार्ये श्रावणाच्या पहिल्या महिन्यात न होता दुसऱ्या महिन्यात होणार आहेत. यावर्षी मंगळवारी, (ता. १८) जुलैपासून अधिक मास सुरू होणार असून, तो १६ ऑगस्टला संपणार आहे तर २६ ऑगस्टला अधिक मासाची सांगता होणार आहे.

याचा परिणाम हिंदू सणांवरही होणार आहे. रक्षाबंधनाचा सण अधिक मास आल्याने ४६ दिवसांनंतर म्हणजेच ३० ऑगस्टला होणार आहे. याचबरोबर गणेशाचे आगमनही लांबणार आहे. यंदा श्रावणात आलेल्या अधिक मासामुळे विघ्नहर्त्याचेही आगमन लांबले आहे.

भक्तांना तब्बल १९ दिवस प्रतीक्षा करावी लागणार आहे. यंदा १९ ला गणेश चतुर्थी आली आहे तर पाचव्या दिवशी म्हणजे २३ ला गौरी-गणपतींचे विसर्जन होणार आहे तर दहा दिवसांच्या बाप्पांना २८ सप्टेंबरला निरोप दिला जाणार आहे.