खासदार गिरीश बापट यांचं नुकतंच निधन झालं. त्यानंतर राज्याचे विरोधी पक्षनेते अजित पवार यांनी बापट यांच्या परिवाराची भेट घेतली. त्यावेळी अजित पवारांनी बापट यांचा एक किस्सा सांगितला आहे. बापटांना २०१४ मध्येच खासदार बनायचं होतं, असं अजित पवारांनी सांगितलं.

अजित पवार म्हणाले,"बापट यांना २०१४ मध्येच खासदार बनायचंय होतं. त्यांनी मला सांगितलं की "अजित आता आमदारकी बस झाली मला खासदार होयाच आहे. परंतु तेव्हा भाजप ने अनिल शिरोळे यांना तिकीट दिलं. त्यामुळे त्यांना आमदार व्हावं लागलं. त्यानंतर सुदैवाने देवेंद्र फडणवीस यांचा सरकार आलं आणि बापट साहेब यांना मंत्रिपदाची संधी मिळाली".

"सगळ्यांमध्ये मिसळून राहणार ते व्यक्तिमत्व होतं. मैत्री सांभाळण्याचे काम त्यांनी केलं. पक्षात वैचारिक भूमिका वेगळी त्यांचे नेते वेगवेगळे पण ते सगळ्यांशीच मैत्रीपूर्ण वागायचे. आमच्यात अनेकदा बैठका झाल्या, पण कधीच ताणतणाव झाला नाही. बापट साहेब अत्यंत मिश्किल होते. काही नावं त्यांनी मला दिली आणि ती मी पुढे बोललो आणि ती फार दूर पर्यंत प्रसिद्ध झाली पण त्याचे खरे सूत्रधार बापट साहेब होते", असंही अजित पवार म्हणाले.