जामनेर (जळगाव) : भाजप नेते गिरीश महाजन (BJP Leader Girish Mahajan) यांनी एका कार्यक्रमा दरम्यान चक्क उपमुख्यमंत्री अजित पवार (Ajit Pawar), जयंत पाटील (Jayant Patil) आणि राधाकृष्ण विखेपाटील (Radhakrishna Vikhe Patil_ यांना सिनेमात घेण्याची विनंती एका निर्मात्याला केली. आणि राजकीय चर्चेला उधाण आले. महाजनांच्या अशा अजब मागणीमुळे एकच चर्चा होत आहे.

अजितदादा, जयंत पाटील, विखेपाटील अन् मला सिनेमात काम द्या

जामनेर येथे ‘हलगट’ या सिनेमाच्या पोस्टरचे प्रमोशन माजी मंत्री गिरीश महाजन यांच्या हस्ते करण्यात आले. यावेळी त्यांनी या चित्रपटाचे निर्माते बाबुराव घोंगडे यांनाच थेट गळ घातली. अजित पवार, सुधीर मुनगंट्टीवार, जयंत पाटील, राधाकृष्ण विखे पाटील आणि माझी आता आमदारकीची सहा टर्म झाली आहे. त्यामुळे उद्या पक्षाने जर आम्हाला उमेदवारी दिली नाही तर आम्हाला चित्रपटात भूमिका दया, अशी मागणी महाजन यांनी एका चित्रपट निर्मत्याकडे केली. तीस वर्षे आमदारकीची झाली आहेत. पक्ष एकाच व्यक्तीला किती वेळा संधी देणार? त्यामुळे पक्षाने आम्हाला उमेदवारी नाही दिली आणि आम्ही रिटायर झालो तर भविष्यात आम्हालाही सिनेमात काम करण्याची संधी द्यावी, असं महाजन म्हणाले. तर तुमच्यासाठी तर इंग्रजी सिनेमाच बनवावा लागेल असं सांगून निर्मात्यानेही महाजन यांची विकेट घेतली. त्यामुळे एकच हशा पिकला.

अनेकदा ‘संकटमोचक’ ठरले

फडणवीस सरकार संकटात असताना महाजन अनेकदा ‘संकटमोचक’ ठरले. महाजन हे जळगावातील जामनेर विधानसभा मतदारसंघातून भाजपचे आमदार आहेत. फडणवीस सरकारमध्ये गिरीश महाजन यांनी मंत्रिपदही भूषवलं आहे.