पुणे: अहमदनगर रुग्णालयातील अग्निकांड प्रकरणी जिल्हा शल्य चिकित्सक ड. सुनील पोखरकणा यांचं निलंबन रद्द करण्यात आलं असून त्यांना जवळच्या शिरुरमध्ये पदस्थापना देण्यात आली आहे. आपले विशेषाधिकार वापरुन राज्यपालांनी हा निर्णय घेतला असून त्यामुळे राज्य सरकार आणि राज्यपाल यांच्यामधील संघर्ष अधिक तीव्र होताना दिसतो आहे.

अहमदनगरमधील जिल्हा रुग्णालयात लागलेल्या आगीनंतर त्यांचं निलंबन करण्यात आलं होतं. ६ नोव्हेंबरला आग लागलेली होती. आयसीयू वार्डमधील या आगीमुळे चार रुग्णांचा उपचारादरम्यान मृत्यू झाला होता. या प्रकरणी चार जणांवर अटकेची कारवाई करण्यात आली होती. त्यांना जामीनही मंजूर झाला होता. मात्र, सुनील पोखरणा यांची अटक व्हावी, अशी मागणी करण्यात येत होती. मात्र, आता त्यांचं निलंबन रद्द होऊन त्यांना जवळच्याच जिल्ह्यात सोयीच्या ठिकाणी ग्रामीण जिल्हा शल्य चिकीत्सक म्हणून बदली करण्यात आली आहे. राज्यपालांनी आपला विशेषाधिकार वापरुन ही बदली केली आहे.

या सगळ्यामध्ये एक विशेष गोष्ट म्हणजे त्यांना पदस्थापना शिरुरमध्ये देण्यात आली आहे. त्यांच्यावर कोणतीही कारवाई होताना दिसत नाहीये. या प्रकरणी राज्य सरकारने कारवाई करुनही राज्यपालांनी विशेषाधिकार वापरुन जवळच्या ठिकाणी पदस्थापना दिली आहे तसेच त्यांचं निलंबनही रद्द केलं आहे.

विभागीय आयुक्तांच्या अध्यक्षतेखाली चौकशी समिती नेमून त्याचा अहवाल राज्य सरकारकडे देण्यात आला आहे. मात्र, हा अहवाला अद्याप उघड करण्यात आला नाहीये. या साऱ्या घटनेमुळे आश्चर्य व्यक्त करण्यात येत आहे.