सोलापूर : राज्यातील पहिलीपासूनचे पुढील सर्व वर्ग 1 डिसेंबरपासून सुरू होणार आहेत. राज्य सरकारने (Maharashtra State Government) त्यासंदर्भातील मार्गदर्शक सूचना जाहीर करीत आज (सोमवारी) नवे आदेश काढले. त्यानुसार मुख्याध्यापक, शिक्षक, विद्यार्थी व पालकांना वेगवेगळ्या सूचना केल्या आहेत. शिक्षकांनी शक्‍यतो त्याच गावात राहावे, लसीचे (Covid Vaccine) दोन्ही डोस घेतलेले असावेत, मुलांनी मास्कचा वापर करावा, विद्यार्थी संख्या अधिक असल्यास दोन सत्रात शाळा भरावावी, एका वर्गात 15 ते 20 विद्यार्थी असावेत, दोन बाकातील अंतर सहा फूट असावे, एका बाकावर एकच विद्यार्थी असावा, अशा विविध सूचना शालेय शिक्षण विभागाने (Department of School Education) दिल्या आहेत. मार्च 2020 नंतर पहिल्यांदाच पहिली ते चौथीच्या शाळा (School) सुरू होत असल्याने मुलांची संख्या लक्षणीय राहणार आहे. या पार्श्‍वभूमीवर सर्व नियमांचे काटेकोर पालन करण्याची जबाबदारी त्या- त्या मुख्याध्यापकांवर असेल, असेही शिक्षणमंत्र्यांनी स्पष्ट केले आहे.

मुख्याध्यापकांसाठी सूचना...

• सर्व मुख्याध्यापक, शिक्षक, शिक्षकेतर कर्मचाऱ्यांनी कोरोना लसीचे दोन्ही डोस घेतलेले हवेत

• गर्दी टाळण्यासाठी विद्यार्थ्यांच्या पालकांना शाळेच्या परिसरात प्रवेश देऊ नये

• जास्त विद्यार्थी असलेल्या शाळा दोन सत्रात भरवाव्यात; एका बाकावर असेल एकच विद्यार्थी

• दोन बाकांमध्ये असावे सहा फुटांचे अंतर; एका वर्गात 15 ते 20 विद्यार्थीच बसवावेत

• मुलांना शाळेत टप्प्याटप्याने बोलवावे; एक दिवसाआड अथवा सकाळी-दुपारी

• शाळांनी वाहतूक आराखडा तयार करून विद्यार्थ्यांच्या सुरक्षिततेची खबरदारी घ्यावी

शिक्षकांसाठी सूचना...

• शिक्षकांनी शक्‍यतो त्या गावातच राहावे

• सार्वजनिक वाहतूक व्यवस्थेचा वापर टाळावा

• शाळेत सर्वांची हात धुण्याची व्यवस्था करावी

• शिक्षक, शिक्षकेतर कर्मचाऱ्यांनी मागील 48 तासातील आरटीपीसीआर चाचणी करून त्याचे प्रमाणपत्र व्यवस्थापन समितीला द्यावे

• दोन लसी घेतलेल्यांनाच शाळा अथवा कार्यालयात प्रवेश दिला जाईल

• परिपाठ, स्नेहसंमेलन यासह गर्दीचे कार्यक्रम ऑनलाइनच घ्यावेत

• आजारी मुलांना लगेचच जवळील रुग्णालयात दाखल करावे; शाळेत येण्यापूर्वी विद्यार्थ्यांच्या पालकांची संमती घ्यावी

विद्यार्थ्यांसाठी सूचना...

• घरात जाताना थेट वॉशरूमकडे जावे

• अंघोळ करून कपडे बदलावेत

• अंघोळीनंतर कपडे साबणाने धुवावेत

• मास्कसुद्धा साबणाने स्वच्छ धुवावा

• पालकांनी मुलांचा मास्क, स्वच्छता, कपड्यांकडे कटाक्ष ठेवावा

पालकांसाठी सूचना...

• मुलगा शाळेतून घरी आल्यावर व दुसऱ्या दिवशी शाळेत जाताना त्याच्या आरोग्याची घ्यावी खबरदारी

• कोविड आजारासंबंधीचे व नियमांचे पालन करण्यासंदर्भात पालकांनी मुलांना घरी मार्गदर्शन करावे

• कोरोना होऊन गेलेल्या विद्यार्थ्यांमध्ये आत्मविश्‍वास निर्माण करावा

• पालकांनी मुलांना लागलेली मोबाईलची सवय मोडण्यासाठी प्रयत्न करावेत

• मुलांना कमीत कमी पुस्तके, वह्या न्याव्या लागतील, याची काळजी घ्यावी