सोलापूर : कर्जाची नियमित परतफेड करणाऱ्या शेतकऱ्यांना महात्मा जोतिराव फुले कर्जमुक्ती योजनेअंतर्गत दिवाळीपूर्वी प्रत्येकी ५० हजारांचे प्रोत्साहनपर अनुदान मिळणार आहे. जिल्हा मध्यवर्ती बॅंकेने तालुकानिहाय लेखापरीक्षण करून २०१८-१९ ते २०१९-२० या तीन वर्षांतील किमान दोन वर्षे कर्जाची परतफेड करणाऱ्यांची यादी तयार केली आहे. २०१९मधील अतिवृष्टीत नुकसान झालेल्या ९४४ शेतकऱ्यांनाही लाभ मिळणार असून, त्या शेतकऱ्यांचीही नावे यादीत समाविष्ट केली आहेत. जिल्हा बॅंकेचे साधारणत: ४१ हजार शेतकरी प्रोत्साहन अनुदानासाठी पात्र ठरतील, असा अधिकाऱ्यांचा दावा आहे.

अनुत्पादित कर्जामुळे अडचणीत सापडलेल्या जिल्हा बॅंकेला कर्जमाफीतून उभारी मिळाली आहे. शेतकऱ्यांकडील कर्जाची थकबाकी त्यातून वसूल झाली आहे. दरम्यान, महाविकास आघाडी सरकारने राज्यातील शेतकऱ्यांना तीन लाखांपर्यंतचे बिनव्याजी कर्ज देण्याचा निर्णय घेतला. त्याचा जिल्ह्यातील जवळपास १२ ते १५ हजार शेतकऱ्यांना लाभ झाला आहे. २०१७-१८, २०१८-१९ आणि २०१९-२० या तीन वर्षांत दोनवेळा कर्जाची नियमित परतफेड केली असल्यास त्या शेतकऱ्यास प्रोत्साहन अनुदान मिळणार आहे. पण, आजी-माजी आमदार, मंत्री, राज्यमंत्री, खासदार, शासकीय कर्मचारी (मासिक वेतन २५ हजारांपेक्षा अधिक, चतुर्थश्रेणी कर्मचारी वगळून), महावितरण, एसटी महामंडळ व अनुदानित संस्थांचे अधिकारी, कर्मचारी, आयकर भरणाऱ्या व्यक्ती, निवृत्तिवेतनधारक (माजी सैनिक वगळून ज्यांचे मासिक निवृत्तिवेतन २५ हजारांपेक्षा अधिक), कृषी उत्पन्न बाजार समिती, सहकारी साखर कारखाना, सहकारी सूतगिरणी, नागरी व जिल्हा बॅंका, सहकारी दूध संघाचे अधिकारी व पदाधिकारी (अध्यक्ष, उपाध्यक्ष व संचालक मंडळ) यांना या अनुदानाचा लाभ मिळणार नाही.

दिवाळीपूर्वी बचत खात्यात जमा होणार अनुदान

अतिवृष्टी, अवकाळी, महापूर, दुष्काळ अशा नैसर्गिक अडचणींचा सामना करणाऱ्या शेतकऱ्यांना कर्जमाफीचा लाभ देण्यात आला. आता नियमित कर्ज परतफेड करणाऱ्यांना ५० हजारांचे प्रोत्साहन अनुदान मिळणार आहे. बॅंकांनी ही रक्कम कर्जापोटी जमा करून घेऊ नये म्हणून अनुदानाची रक्कम शेतकऱ्यांच्या बचत खात्यात जमा केली जाणार आहे. त्यासाठी शेतकऱ्यांचे बचत खाते नंबरदेखील बॅंकांकडून घेतले जात आहेत. दिवाळीपूर्वी ही रक्कम शेतकऱ्यांना मिळणार आहे.

५ सप्टेंबरला आधार लिंक नसलेल्यांची यादी

प्रोत्साहन अनुदानासाठी पात्र शेतकऱ्यांची यादी बॅंकांनी ३८ मुद्द्यांच्या आधारावर अंतिम केली आहे. त्यानंतर ज्या शेतकऱ्यांचे बॅंक खाते आधार लिंक केलेले नाही, त्यांची यादी ५ सप्टेंबरला बॅंकांसह गावोगावच्या शाखांमध्ये लावली जाणार आहे. त्या शेतकऱ्यांचे आधार लिंक केले जाईल. त्यानंतर अंतिम यादी शासनाला सादर होऊन पात्र लाभार्थींना अनुदान वितरीत होईल, अशी माहिती जिल्हा अग्रणी बॅंकेचे व्यवस्थापक प्रशांत नाशिककर यांनी दिली.