मुंबईः मुंबईतील धारावी परिसरात 28 वर्षीय महिलेच्या संशयास्पद मृत्यू प्रकरणी आरोपी पतीला पोलिसांनी शुक्रवारी रात्री अटक केली आहे.

माहिमच्या शाहू नगर पोलिसांनी या प्रकरणी हत्येचा गुन्हा दाखल केला होता. मोहम्मद अन्वर मोहम्मद अकबर शेख असे आरोपी पतीचे नाव असून पत्नी परवीन शेख व नऊ वर्षांच्या मुलीसोबत धारावी येथील पेरियार नगरमध्ये राहत होता.

शेखची मुलगी गुरुवारी शिकवणीसाठी गेली होती. दुपारी घरी परतल्यानंतर परवीन जमिनीवर पडल्याचे तिच्या दृष्टीस पडले. परवीनच्या चेहऱ्यावर रूमाल व गळ्यावर एक स्कार्प होता. वडिलांकडे विचारणा केली असता आई शिडीवरून पडल्याचे शेखने तिला सांगितले.

आरोपी पतीने त्यानंतर पत्नीला शीव येथील लोकमान्य टिळक रुग्णालयात नेले. तेथील डॉक्टरांनी तपासून महिलेला मृत घोषित केले.

महिलेच्या गळ्यावर, गालावर व चेहऱ्यावर रक्त होते. त्यामुळे पोलिसांना याबाबतची माहिती देण्यात आली. परवीनच्या गळ्यावर यू मार्क असल्याचे निष्पन्न झाले आहे. याबाबत पोलिसांनी परवीनची बहिण अंगुरीखातून हिच्याकडे चौकशी केली.

पती-पत्नीमध्ये वारंवार भांडणे होत होती. त्यातून शेखने परवीनची हत्या केल्याची शंका अंगुरीखातूने व्यक्त केली. तिचा जबाब नोंदवून शाहू नगर पोलिसांनी याप्रकरणी हत्येचा गुन्हा दाखल केला आणि आरोपी शेखला शुक्रवारी रात्री अटक केली.

याप्रकरणी पोलीस अधिक तपास करीत असून पोलीस परवीनच्या शवविच्छेदन अहवालाच्या प्रतीक्षेत आहेत.