मुंबई - भाजपच्या नेत्या पंकजा मुंडे यांच्या परळीतील वैद्यनाथ सहकारी साखर कारखान्यावर केंद्रीय जीएसटी आयुक्तालयाने मोठी कारवाई केली आहे. केंद्रीय जीएसटी आयुक्तालयाकडून कारखान्याची 19 कोटी रुपयांची मालमत्ता जप्त करण्यात आली आहे. यावरून राजकारण तापलं असून राष्ट्रवादी काँग्रेसचे नेते अनिल देशमुख यांनी भाजपवर टीका केली आहे.

पंकजा मुंडे यांच्यावर त्यांचा पक्ष खूप अन्याय करत आहे. ज्या स्वर्गीय गोपीनाथ मुंडे यांनी भारतीय जनता पार्टीला महाराष्ट्रात ताकद देण्याचे काम केले, पक्ष वाढविला त्यांच्या सर्व सहकाऱ्यांमुळे भारतीय जनता पार्टी पक्ष महाराष्ट्रात मोठ्या प्रमाणावर वाढला. पण दुर्दैवाने गोपीनाथ मुंडे यांची कन्या पंकजा मुंडे यांच्यावर पक्षात ज्या पद्धतीने त्यांच्यावर अन्याय होत आहे, त्याबद्दल त्यांनी विचार करून योग्य भूमिका घ्यायला पाहिजे असे मतही अनिल देशमुख यांनी व्यक्त केले.

याआधी बच्चू कडू यांनी देखील यावर प्रतिक्रिया दिली होती. ते म्हणाले होते की, भाजप नेत्या पंकजा मुंडे यांनी राज्यात यात्रा काढली आणि त्यानंतर त्यांच्या कारखान्यावर कारवाई सुरू झाली. म्हणजेच त्या महाराष्ट्रात फिरल्या त्यामुळं कारवाई सुरू झाली असेल, असा दावा बच्चू कडू यांनी केला होता.