मुंबई : जगप्रसिद्ध वेरूळ लेण्यांजवळील (Ellora caves) जैन किर्तिस्तंभ (Jain Kirti Stambh,) हटवण्यात येणार नाही, असे स्पष्ट आश्वासन केंद्रीय संस्कृती मंत्री जी. किशन रेड्डी (G kishan Reddy) यांनी जैन समाजाच्या राष्ट्रीय संघटनेच्या शिष्टमंडळाला दिले आहे. या लेण्यांजवळील कीर्तीस्तंभ हटवण्याचा निर्णय पुरातत्त्व विभागातर्फे घेतला होता. त्यामुळे देशभरातील जैन समाजामध्ये अस्वस्थता पसरली होती.

यासंबंधी अखिल भारतीय जैन अल्पसंख्याक महासंघाचे राष्ट्रीय अध्यक्ष ललित गांधी यांच्या नेतृत्वाखालील शिष्टमंडळाने जी. किशन रेड्डी यांची हैदराबाद येथे भेट घेतली. यासंदर्भात संबंधित वरिष्ठ अधिकाऱ्यांशी चर्चा करून अंतिम निर्णय घेतला जाईल असे रेड्डी यांनी यावेळी सांगितले. जैन समाजाचे राष्ट्रनिर्माण कार्यातील योगदान, भगवान महावीर यांचा विश्व शांतीचा संदेश देशातील सर्वांसाठीच सन्माननीय आहेत, त्यामुळे समाजाच्या भावना जपल्या जातील, असेही त्यांनी सांगितले.

गांधी यांनी कीर्तीस्तंभाची उभारणी व त्याच्या देखभाली संबंधातील माहिती देऊन याविषयीच्या समाजाच्या भावना व्यक्त केल्या. याचबरोबर जैन समाजाच्या देशभरातील विविध ठिकाणी असलेल्या प्राचीन तीर्थक्षेत्र संबंधी पुरातत्त्व विभागाकडून येत असलेल्या अडचणी, अनेक प्राचीन मंदिरांचा प्रलंबित असलेला जीर्णोद्धार, विविध ठिकाणी उत्खननात आढळणार्‍या जैन तीर्थंकरांच्या प्रतिमा व मंदिरांचे अवशेष याचे हस्तांतरण यासंबंधी येणाऱ्या अडचणी, या बाबींवर त्यांनी संस्कृती मंत्र्यांशी सविस्तर चर्चा केली.

सम्मेद शिखरजी, गिरणार, शत्रुंजय आदी तीर्थांचे पावित्र्य जपण्यासंबंधी पुरातत्त्व विभाग, संस्कृती खात्याचे वरिष्ठ अधिकारी यांची जैन समाजाच्या शिष्टमंडळासमवेत लौकरच संयुक्त बैठक आयोजित केली जाईल असे आश्वासनही रेड्डी यांनी दिले. यावेळी झालेल्या चर्चेत महासंघाचे राष्ट्रीय महामंत्री संदीप भंडारी, महासंघाच्या आंध्र प्रदेश विभागाचे अध्यक्ष मुकेश चौहान, तेलंगणा विभागाचे अध्यक्ष विमल नहार, दिगंबर समाजाचे पदाधिकारी अशोक पहाडे, मिथुन पोरवाल आदी मान्यवरांनी चर्चेत सहभाग घेतला.