मुंबईः काँग्रेस नेते मिलिंद देवरा (Milind Deora) काँग्रेसला रामराम करत शिंदेंच्या शिवसेनेत (Shivsena) प्रवेश करणार असल्याची माहिती आहे. देवरा यांनी रविवारी पक्षाच्या प्राथमिक सदस्यत्वाचा राजीनामा दिला . सोशल मीडियाच्या माध्यमातून त्यांनी ट्विट करत ही माहिती दिली आहे.

मिलिंद देवरांनी घेतलेल्या भूमिकेमुळे राज्याच्या राजकारणत खळबळ उडाली आहे. काँग्रेस नेते जयराम रमेश यांनी यासंदर्भात एक विशिष्ट टिपण्णी केली असून पंतप्रधान नरेंद्र मोदी यांनीच मिलिंद देवरांच्या पक्ष सोडण्याची तारीख निश्चित केली होती, असं ते म्हणालेत.

जयराम रमेश यांनी एक्स या सोशल मीडिया प्लॅटफॉर्मवर लिहिलं की, ''मुरली देवरा हे नेहमी काँग्रेस पक्षासोबत ताकदीने उभे राहिले.'' पीटीआयला दिलेल्या मुलाखतीमध्ये ते म्हणाले की, वास्तविक त्यांचं सगळं नाटक सुरु होतं, त्यांची पक्ष सोडण्याचं निश्चित केलं होतं. पंतप्रधान नरेंद्र मोदी यांच्याकडून त्यांच्या पक्ष सोडण्याची वेळ ठरवण्यात आलेली होती.

जयराम रमेश पुढे म्हणाले, मिलिंद देवरा यांचे वडील मुरली देवरा यांच्यासोबत मी अनेक वर्षे काम केलं. त्यांचे सगळ्या पक्षांतील नेत्यांसोब मैत्रीचे संबंध होते. परंतु ते एक कडवट काँग्रेसी नेते होते. जे कायम सुख-दुःखात पक्षासोबत उभे राहिले.

असं म्हणत त्यांनी मिलिंद देवरा यांना टोला लगावला. देवरा हे शिवसेनेमध्ये प्रवेश करतील, असं बोललं जात आहे. काही वेळापूर्वी ते मुख्यमंत्र्यांच्या वर्षा निवासस्थानी पोहोचले आहेत.

मिलिंद देवरा कोण आहेत?

मिलिंद देवरा हे महाराष्ट्र काँग्रेसचे ज्येष्ठ नेते मुरली देवरा यांचे पुत्र आहेत. मुरली देवरा केंद्र सरकारमध्ये मंत्री होते. मुंबई दक्षिण मतदारसंघातून काँग्रेसने नेहमीच विजय मिळवला. त्यामुळे देवरा कुटुंबाचा या लोकसभा मतदारसंघाशी अनेक वर्षांपासून संबंध आहे. इतकेच नाही तर उद्योगपती अंबानी त्यांचा प्रचार करायचे, अशी देवरा यांची ओळख आहे. मागील 2019 च्या निवडणुकीत देखील रिलायन्स इंडस्ट्रीजचे चेअरमन मुकेश अंबानी यांनी देवरा पाठिंबा दिला होता.