सक्तवसुली संचलनालयाने (ED) मुख्यमंत्री उद्धव ठाकरेंच्या मेहुण्यांवर कारवाई करत त्यांच्या सदनिका जप्त केल्या. यावर गृहनिर्माण मंत्री जितेंद्र आव्हाड प्रतिक्रिया देताना म्हणाले, “नुसतं चौकशीला बोलवलं तरी, माझी मुलगी आत्महत्या करेल.” त्यांच्या या वक्तव्यावर अनेक प्रतिक्रिया उमटत आहे. यातच त्यांचं एक वक्तव्य सोशल मिडियावर व्हायरल होत आहे, "माझं वैयक्तिक मत विचाराल तर मी माझ्या मुलीला महाराष्ट्रात ठेवणार नाही." मात्र जितेंद्र आव्हाडांनी आपण तसं म्हटले नसल्याचे स्पष्ट सांगितले तरीसुद्धा विरोधक त्यांच्या त्या वक्तव्यावरुन आव्हाडांवर टीका करत आहे.

सदाभाऊ खोत यांनी आव्हाडांचे वक्तव्य ट्वीट करत जितेंद्र आव्हाडांवर ताशेरे ओढले.

सदाभाऊ खोत म्हणाले, “हा जिजाऊ आणि शिवरायांचा महाराष्ट्र आहे. आमच्या मुली इथेच मोठया होतील. . हिजाब आणि बुरखा घालून फिरणाऱ्या इतर राज्यात आपण आपली मुलगी पाठवणार आहात का?”

यावर जितेंद्र आव्हाडांनी ट्वीट करत त्यांच्या टीकेला प्रतिउत्तर दिले. आव्हाड म्हणाले, “शिवरायांनी धाडसी राजकारण केले शत्रू च्या बायका मुलं मुलिंना छळले नाही.. उगाच त्यांचा कारभार आणि त्यांना बदनाम करू नका तशी शिकवण जिजाऊंची होती. राज्यपाल जेव्हा छत्रपतीं बद्दल बोलले तेव्हा कुठे होतात”

‘माझं वैयक्तिक मत विचाराल तर मी माझ्या मुलीला महाराष्ट्रात ठेवणार नाही’; असे वक्तव्य आपण बोलले नसल्याचे जितेंद्र आव्हाडांनी स्पष्ट सांगितले. मात्र तरीसुध्दा या वक्तव्यावरुन राजकीय वर्तुळात चांगलीच चर्चा रंगली असून विरोधक आव्हाडांवर टीका करताना दिसत आहे.