कार्तिकी एकादशी निमित्त आज उपमुख्यमंत्री देवेंद्र फडणवीस यांच्या हस्ते विठ्ठल रुक्मिणीची शासकीय महापूजा करण्यात आली. यावेळी फडणवीसांच्या पत्नी अमृता फडणवीस यादेखील उपस्थित होत्या. रामकृष्ण हरीच्या गजराने भारून गेलेल्या वातावरणात वारकऱ्यांसोबत या दाम्पत्यानेही ताल धरला.

कार्तिकी एकादशीनिमित्त पंढरपुरातल्या विठ्ठल मंदिरात उपमुख्यमंत्री देवेंद्र फडणवीस यांनी सपत्नीक शासकीय महापूजा केली. या पूजेआधी देवेंद्र फडणवीस आणि त्यांच्या पत्नी अमृता दोघांनीही वारकऱ्यांशी संवाद साधला. यावेळी तेही विठुनामाच्या गजरात सहभागी झाले. वारकऱ्यांसोबत अमृता फडणवीस यांनी फुगडी खेळली तर हे दोघेही टाळाच्या तालावर थिरकले.

यंदा विठ्ठलाच्या महापूजेचा मान औरंगाबादमधल्या फुलंब्री तालुक्यातल्या शिरोड इथले रहिवासी असलेल्या उत्तमराव आणि कलावती साळुंखे या दाम्पत्याला मिळाला. यावेळी विठ्ठल रुक्मिणी मंदिर समितीच्या वतीने श्री नामदेव पायरी आणि श्री विठ्ठल सभामंडप, तसंच मंदिराच्या गाभाऱ्यात फुलांची आकर्षक आरास करण्यात आली आहे.