कोल्हापूरः काल शरद पवारांची कोल्हापुरात स्वाभिमान सभा संपन्न झाली. या सभेसाठी राष्ट्रवादी काँग्रेसमधील बड्या नेत्यांची उपस्थिती होती. सर्वांनीच अजित पवार गट आणि भाजपवर जोरदार टीकास्र सोडलं. महत्त्वाचं म्हणजे संभाजीराजे छत्रपती यांचे वडील शाहू महाराज हे पवारांसोबत मंचावर उपस्थित होते.

आज शरद पवारांनी त्यांच्या बहीण सरोज पाटलांची भेट घेतली. आजारी असल्यामुळे सरोज पाटील ह्या रुग्णालयात उपचार घेत आहेत. शरद पवारांनी त्यांची भेट घेऊन तब्येतीची चौकशी केली आणि डॉक्टरांशी संवाद साधला. यावेळी सरोज पाटील यांनी कालच्या सभेबद्दलही पवारांना विचारलं.

बहीण-भावाच्या भेटीत काय चर्चा झाली?

शरद पवार आज कोल्हापुरात आहेत. यावेळी त्यांनी आपल्या भगिनी सरोज पाटलांची रुग्णालयात जाऊन भेट घेतली. प्रकृती खालावल्यानं सरोज पाटलांवर खासगी रुग्णालयात उपचार सुरु आहेत. काल संध्याकाळी पवारांची कोल्हापुरातील दसरा चौकात सभा झाली. सभेनंतर सकाळी पत्रकार परिषद घेतली आणि त्यानंतर पवार हे बहिणीला भेटायला रुग्णालयात गेले. “कमी बोल, तुझी तब्येत चांगली राहील” असं म्हणत त्यांनी बहिणीला सल्ला दिला तर सरोज पाटलांनी पवारांकडे सभेविषयी विचारणा केली.

सरोज पाटील यांनी यावेळी उपचार सुरु असलेल्या रुग्णालयाचं कौतुक केलं. शिवाय उपस्थित अनेकांची ओळख करुन दिली. भाऊ भेटायला आल्याने बहिणीच्या चेहऱ्यावरचा आनंद लपून राहिला नव्हता. यावेळी रुग्णालय स्टाफ आणि सरोज पाटील यांच्या कुटुंबातील सदस्यांची उपस्थिती होती.