ठाणे : केंद्रीय मंत्र्याच्या मुलाने उत्तर प्रदेशामधील लखीमपूर (lakhimpur) येथील शेतकऱ्यांना चिरडून ठार केल्याच्या निषेधार्थ महाविकास आघाडीतर्फे (mva government) (सोमवार) ‘महाराष्ट्र बंद’ची (Maharashtra bandh) हाक देण्यात आली आहे. ठाण्यातील अनेक भागांत ‘बंद’चे फलक लागले आहेत. या क्रूर घटनेचा निषेध करण्यासाठी शिवसेना नेते तथा पालकमंत्री एकनाथ शिंदे (eknath shinde) आणि राष्ट्रवादी काँग्रेसचे नेते तथा गृहनिर्माण मंत्री जितेंद्र आव्हाड (jitendra awhad) यांच्या मार्गदर्शनाखाली बंद पुकारण्यात येत आहे.

ठाणेकर नागरिकांनी या बंदमध्ये सहभागी होण्याचे आवाहन एकनाथ शिंदे आणि जितेंद्र आव्हाड यांनी केले आहे. दरम्यान, बंदच्या पार्श्वभूमीवर ठाण्यात पोलिसांचा मोठा फौजफाटा तैनात ठेवण्यात आला आहे. ‘महाराष्ट्र बंद’मध्ये मोठ्या संख्येने सहभागी होण्याचे आवाहन राष्ट्रवादी काँग्रेसचे अध्यक्ष शरद पवार यांनी केले होते. शेतकऱ्यांची हत्या करण्याचा निर्णय घेणाऱ्या या भाजप सरकारचा विरोध करण्यासाठी ‘भारत बंद’चा निर्णय घेण्यात आला असल्याचे जयंत पाटील यांनी सांगितले आहे.

दरम्यान, महाविकास आघाडीने महाराष्ट्र बंद पुकारल्यामुळे आजारी रजा सोडून सर्व पोलीस अधिकाऱ्यांच्या सुट्ट्या देखील रद्द करण्यात आल्या आहेत. पोलिसांच्या अतिरिक्त तुकड्या दाखल झाल्या आहेत. प्रत्येक विभागात राज्य राखीव दलाच्या तुकड्या तैनात करण्यात येणार आहेत. आवश्यकतेनुसार प्रतिबंधक कारवाई करण्यात येईल, तसेच अनुचित प्रकार घडणार नाही याची दक्षता घेण्यात येणार असल्याचे विशेष पोलिस शाखेचे उपायुक्त सुधाकर पाठारे यांनी सांगितले.