परळी वैजनाथ (जि.बीड) : लता दीदी नेहमी सुरात कोरल्या राहतील, मनात देखील..! अशा शब्दांत भाजपच्या (BJP) राष्ट्रीय सचिव पंकजा मुंडे यांनी गानसम्राज्ञी लता मंगेशकर यांना श्रद्धांजली अर्पण केली आहे. गेल्या सात दशकांहून अधिक काळ जगभरातील अगणित संगीतप्रेमींचं भावविश्व समृद्ध करणारा दैवी स्वर (लता दीदी) आज अखेर शांत झाला. जगविख्यात पार्श्वगायिका, गानसम्राज्ञी, भारतरत्न लता मंगेशकर (Lata Mangeshkar) यांचे निधन सर्वांनाच वेदना देणारे आहे. त्यांच्या निधनाने सर्वस्तरातून शोकभावना व्यक्त केली जात आहे. (Lata Mangeshkar Song Always In Heart, Said Pankaja Munde)

पंकजा मुंडे (Pankaja Munde) यांनी सोशल मीडियावर आपल्या शोकभावना व्यक्त केल्या आहेत. त्यांनी म्हटले आहे की, प्रत्येक स्वर ऐकणार्‍या, गाणार्‍या, गुणगुणणाऱ्यांनाच नव्हे तर अगदी आसमंतातील स्वरांच्या अणूरेणूंना ही प्रभावित करणारा तो मंजुळ पवित्र आवाज, सोज्वळ भाव, जरीकाठी साडी, अंगभर पदर, लोभस हसरा चेहरा काळाआड गेला तरी नजरेआड जात नाही 'आदरांजली' लता दीदी नेहमी सुरात कोरल्या राहतील, मनात देखील!! अशा शब्दांत त्यांनी आपल्या भावना व्यक्त केल्या आहेत.