मुंबई : देशाच्या बाहेर गेलेला काळा पैसा बाहेर आणून देशातल्या नागरिकांना १५-१५ लाख रुपये देईन, असं पंतप्रधान नरेंद्र मोदी (PM Modi) म्हणाले होते. त्या १५ लाखांचं काय झालं? असा सवाल ऊर्जामंत्री नितीन राऊत (Maharashtra Minister Nitin Raut) यांनी उपस्थित केला. त्यानंतर विरोधी पक्षनेते देवेंद्र फडणवीस (Opposition Leader Devendra Fadnavis) चांगलेच आक्रमक झाले. पंतप्रधान नरेंद्र मोदी असं कधीच बोलले नाही. मी तुम्हाला खुलं आव्हान देतो, पंतप्रधान असं बोलल्याचा पुरावा द्या, असा दावा फडणवीसांनी केला.

शेतकऱ्यांना सूट देण्याचं मोदींनीही जाहीर केलं होतं. शेतकऱ्यांना ५० ५० लाख त्यांच्यात खात्यात देईन, असं मोदी म्हणाले होते. त्यांनी दिले का? असा प्रश्न ऊर्जामंत्र्यांनी विचारला. त्यानंतर फडणवीस चांगलेच आक्रमक झाले. देशाचे पंतप्रधान मोदींनी अस म्हटल्यांचं हे दाखवून द्यावं, नाहीतर सभागृहाची माफी मागावी. सभागृहात नसलेल्या व्यक्तीबद्दल चुकीचं वक्तव्य करता येणार नाही. मी खुलं आव्हान देतो, की मोदींनी असं म्हटल्याचा एक तरी पुरावा दाखवा, माफी मागा नाहीतर हे चालू देणार नाही, असं फडणवीस म्हणाले.

ऊर्जामंत्री परत म्हणाले, ''देशाच्या बाहेर गेलेला काळा पैसा बाहेर आणून देशातल्या नागरिकांना १५-१५ लाख रुपये देईन, असं पंतप्रधान नरेंद्र मोदी म्हणाले होते. त्या १५ लाखांचं काय झालं?'' त्यावर देखील फडणवीस आक्रमक झाले आणि हे चुकीचं वक्तव्य असल्याचं फडणवीस म्हणाले. पंतप्रधान असं कधीच बोलले नाही. ते असं म्हणाले याचा पुरावा द्या, मी तुम्हाला खुले आव्हान देतो, असं फडणवीस म्हणाले.

भास्कर जाधवांकडून पंतप्रधानांची नक्कल -

पंतप्रधानांनी १५ लाख देण्याची घोषणा केलीच नाही, या फडणवीसांच्या दाव्यानंतर भास्कर जाधव यांनी मोदींच्या घोषणेची आठवण करून दिली. यावेळी त्यांनी मोदींच्या शैलीत बोलत त्यांची नक्कल केली. यावरून विरोधक चांगलेच आक्रमक झाले. त्यांनी भास्कर जाधव यांच्या निलंबनाची मागणी केली. त्यानंतर मी नक्कल केली नाही, असं भास्कर जाधव म्हणाले. पण, विरोधकांनe ते अंगविक्षेप वाटत असतील, तर मी ते मागे घेतो, असं जाधव म्हणाले. तरीही भास्कर जाधवांनी माफी मागावी, अशी मागणी विरोधकांनी लावून धरली.