मुख्यमंत्री एकनाथ शिंदे यांच्या अयोध्या यात्रेची सांगता झाली. शरयू नदीच्या महाआरतीने शिंदेंच्या या यात्रेचा शेवट झाला. यानंतर मुख्यमंत्री शिंदे राज्यात परतले आहेत. दरम्यान गेल्या काही दिवसांपासून राज्याला गारपीटीने अक्षरशा झोडपलं आहे.

शेतकऱ्यांच्या हातातोंडाशी आलेला घास गारपीटीने हिरावून घेतला आहे. शेतकऱ्यांची जनावरे मृत्यु मुखी पडले आहेत. तसेच हजारो घरांचं नुकसान झालं आहे. मात्र राज्याचे राज्यकर्ते दोन दिवस पर्यटनासाठी बोहर गेले होते.

सोमवारी मुख्यमंत्री एकनाथ शिंदे यांनी सह्याद्री अतिथीगृह येथे अवकाळी पावसामुळे झालेल्या नुकसानीवर चर्चा करण्यासाठी दुपारी १ वाजता मंत्री मंडळाची बैठक बोलावली आहे. शिंदे यांच्या अध्यक्षतेखाली होणाऱ्या बैठकीत पिकांच्या नुकसानीवर उपाययोजना आणि शेतकऱ्यांना नुकसान भरपाई देण्याबाबत मुख्यमंत्री चर्चा करणार आहेत.

दरम्यान रविवारी अकोला जिल्ह्यातल्या बाळापूर तालुक्यातील पारस येथील बाबूजी महाराज मंदिरात दुर्दैवी घटना घडली आहे. मंदीरात आरती सुरू असतानाच मंदिराच्या शेडवर झाड कोसळल्याची घटना घडली होती.

शेडखाली अडकलेल्या लोकांनाचे बचावकार्य रात्री उशीरपर्यंत सुरू होते. या दुर्घटनेत ७ जणांचा दुर्दैवी मृत्यू झाला असून ३५ जण जखमी झाले आहेत. जखमींवर अकोला येथील शासकीय रुग्णालयात उपचार सुरू आहेत.

तर अहमदनगर, वाशिम, अकोला, छत्रपती संभाजीनगर या जिल्ह्यांना अवकाळी पावसाने चांगलेच झोडपले आहे. वादळी पावसामुळे अनेकांच्या घरावरील पत्रे उडून गेले आणि पावसाचं पाणी शिरलं. एक-दोन दिवस उलटले तरी दखील नुकसानीचे पंचनामे होत नाहीत. अशातच जगायचं कसं, असा प्रश्न शेतकऱ्यांना पडला आहे.