महाराष्ट्र प्रदेश काँग्रेस कमिटीचं दोन दिवसीय नवसंकल्प शिबीर आजपासून शिर्डीत सुरू होत आहे. काँग्रेस नेते आणि महसूल मंत्री बाळासाहेब थोरात यांनी याबद्दलची माहिती दिली आहे. एक आणि दोन जून रोजी होणाऱ्या या शिबिरादरम्यान उदयपूर नवसंकल्प शिबिरातल्या घोषणापत्राच्या अंमलबजावणीसाठीचं नियोजन केलं जाईल. (Maharashtra Congress Committee)

याबद्दल बोलताना बाळासाहेब थोरात (Balasaheb Thorat Congress) म्हणाले की काँग्रेसचं दोन दिवसीय नवसंकल्प शिबीर नुकतंच उदयपूरमध्ये पार पडलं. या शिबिरात तयार करण्यात आलेलं घोषणा पत्र राज्यांमध्येही लागू करण्यात आलं आहे. यासाठी राजकीय, संघटनात्मक, अर्थशास्त्रविषयक, कृषी, सामाजिक न्याय आणि युवकांसह महिला सशक्तीकरणाविषयीही चर्चा करण्यासाठी सहा गटांची स्थापना करण्यात आली आहे. हे सहा गट घोषणापत्राच्या अंमलबजावणीसाठीचा एक रोडमॅप तयार करतील आणि त्यावर चर्चा होईल. त्यानंतर अहवाल सादर केला जाईल.

या शिबिरामध्ये पार्टीचे प्रदेश प्रभारी एच. के. पाटील, प्रदेशाध्यक्ष नाना पटोले, महसूल मंत्री बाळासाहेब थोरात, मंत्री अशोक चव्हाण, सर्व कॅबिनेट मंत्री, पक्षाचे सर्व पदाधिकारी उपस्थित राहणार आहेत.